ՄԱԿ-ի գլխավոր քարտուղարի ուղերձը Կանանց միջազգային օրվա առթիվ

Կանայք և աղջիկները մեծ հաջողությունների են հասել։ Նրանք վերացնում են արգելքներն ու կարծրատիպերը և նպաստում ավելի արդար և հավասար աշխարհ ունենալուն։

Այնուամենայնիվ, նրանք բախվում են հսկայական խոչընդոտների։ Միլիարդավոր կանայք և աղջիկներ բախվում են մարգինալացման, անարդարության և խտրականության, իսկ կանանց նկատմամբ բռնության շարունակվող համաճարակը անարգանք է մարդկության համար։

Մեր աշխարհը դեռևս արտացոլում է հազարամյակներ շարունակ գոյություն ունեցող ուժային հարաբերությունները, որոնցում գերակշռում են տղամարդիկ։

Եվ առաջընթացը վտանգված է կանանց իրավունքների դեմ պայքարի պատճառով։

Ներկայիս տեմպերով իրավական հավասարության կհասնենք մոտ երեք հարյուր տարի անց։

Պետք է շատ ավելի արագ շարժվենք։

Կանանց միջազգային օրը կանգնած ենք իրենց իրավունքների համար պայքարող կանանց և աղջիկների կողքին և պարտավորվում ենք արագացնել առաջընթացը:

Այս տարվա թեման՝ «Ներդրումներ անել հօգուտ կանանց», հիշեցնում է, որ հայրիշխանությանը վերջ դնելու համար գումար է անհրաժեշտ։

Պետք է աջակցենք կանանց այն կազմակերպություններին, որոնք այս պայքարի առաջնագծում են։

Եվ պետք է ներդրումներ կատարենք ծրագրերում՝ վերջ դնելու կանանց նկատմամբ բռնությանը, ինչպես նաև խթանելու կանանց ներգրավվածությունն ու առաջնորդությունը տնտեսություններում, թվային տեխնոլոգիաների, խաղաղարարության և կլիմայական գործողությունների մեջ:

Անհրաժեշտ ընդլայնել կայուն զարգացման համար ֆինանսավորման հնարավորությունները, որպեսզի երկրները միջոցներ ունենան ներդրումներ անելու հօգուտ կանանց և աղջիկների:

Պետք է նաև ավելացնենք կին ղեկավարների թիվը բիզնեսում, ֆինանսներում, կենտրոնական բանկերում և ֆինանսների նախարարություններում: Սա կարող է օգնել խթանել ներդրումները կանանց և աղջիկների կարիքներին համապատասխանող քաղաքականության և ծրագրերի մեջ:

Կանանց իրավունքներն արդար, խաղաղ, բարգավաճ հասարակություններ ունենալու բանալին են: Սա բխում է բոլորիս շահերից։

Միասին շտապ գործողություններ ձեռնարկենք այն իրականություն դարձնելու համար:

Շնորհակալություն։