Բուլղարիայում, Հայաստանում, Վրաստանում և Մոլդովայում ՄՄԿ ներկայացուցչությունները մեկնարկում են Բուլղարիայում աշխատուժի շարժունակության վերաբերյալ իրազեկության բարձրացման արշավ

Միջոցառմանը մասնակցում էին ՀՀ աշխատանքի և սոցիալական հարցերի նախարարության Աշխատանքի և զբաղվածության վարչության պետ Ժորա Սարգսյանը, ՀՀ-ում  Բուլղարիայի արտակարգ և լիազոր դեսպան Կալին Վասիլև Անաստասովը, ՀՀ-ում  Եվրոպական միության պատվիրակության համագործակցության բաժնի ղեկավարի տեղակալ Սիլյա Կասմանը, ինչպես նաև պետական ​​կառույցների,  քաղաքացիական հասարակության ներկայացուցիչներ, փորձագետներ։

Ծրագրի նպատակն է աջակցել ՀՀ կառավարությանը իրականացնելու Հայաստանի Հանրապետության և Բուլղարիայի Հանրապետության միջև ստորագրված աշխատանքային շարժունակության կարգավորման վերաբերյալ երկկողմ համաձայնագիրը և նպաստել Հայաստանի (ինչպես նաև Վրաստանի և Մոլդովայի) անվտանգ և ավելի լավ կառավարվող աշխատուժի շարժունակությանը դեպի Բուլղարիա։ 

Հիմք ընդունելով ծրագրի շրջանակում իրականացված Բուլղարիայի աշխատաշուկայի կարիքների և բացերի գնահատման վերաբերյալ ուսումնասիրությունը՝ ծրագրի շրջանակում նախատեսվում է Հայաստանի, Վրաստանի և Մոլդովայի քաղաքացիներին տրամադրել Բուլղարիայում զբաղվածության հնարավորությունների մասին թիրախավորված տեղեկատվություն՝ Բուլղարիայի աշխատանքային և սոցիալական հարցերի վերաբերյալ տեղեկատվական արշավների անցկացման միջոցով: Ծրագիրը թույլ կտա աշխատանքային միգրանտներին կայացնել տեղեկացված որոշումներ՝ միգրացիայի հեռանկարների վերաբերյալ բուլղարական աշխատաշուկա ընդգրկվելու համատեքստում իրենց ակնկալիքները կառավարելու նպատակով:

ՀՀ-ում Բուլղարիայի արտակարգ և լիազոր դեսպան Կալին Վասիլև Անաստասովն իր խոսքում ընդգծեց միգրացիայի ոլորտում երկու երկրների համագործակցության կարևորության մասին․ «Համոզված եմ, որ համաձայնագիրը կնպաստի երկու երկրների տնտեսական և սոցիալական զարգացմանը և կխթանի մեր ժողովրդի միջև մշակութային փոխանակումը» - նշեց դեսպանը:

Իր խոսքում Սիլյա Կասմանը հավելեց, որ աշխատանքային միգրացիան պետք է դիտարկել որպես հնարավորություն ինչպես ԵՄ անդամ երկրների, այնպես էլ Հայաստանի համար։ Ծրագրի գաղափարն է խթանել շրջանառու միգրացիան և արտերկրում աշխատող մարդկանց տեղեկացնել իրենց իրավունքների մասին՝ հանցավոր ցանցերից խուսափելու համար:

Բացման խոսքին և ծրագրի ներկայացմանը հաջորդեց ակտիվ քննարկում միջացառման մասնակիցների միջև, բարձրացվեցին և պարզաբանվեցին մի շարք հարցեր ինչպես ՀՀ իշխանությունների, այնպես էլ փորձագետների և ՄՄԿ ներկայացուցիչների կողմից։

Արարողությունը եզրափակվեց ՄՄԿ Բուլղարիայի գրասենյակի ղեկավար պարոն Ռադոսլավ Ստամենկովի և ՄՄԿ Հայաստանի գրասենյակի ղեկավար տիկին Իլոնա Տեր-Մինասյանի փակման խոսքով։

Ծրագիրը իրակակացվում է Բուլղարիայի Հանրապետության Ազգային ծրագրի կողմից՝ 2014-2020 թվականների Ապաստանի, միգրացիայի և ինտեգրման հիմնադրամի ֆինանսական աջակցությամբ, որը համաֆինանսավորվում է Եվրոպական միության կողմից: