Ներկայացվել են աշխատավայրում անհատական աշխատանքային բողոքների լուծման ներքին ընթացակարգերի ուղեցույցներ

Աշխատանքային իրավունքների ամրապնդման և արդար ու թափանցիկ աշխատանքային միջավայրի ձևավորման գործողությունների շրջանակում ՄԱԿ-ի հայաստանյան գրասենյակում դեկտեմբերի 5-ին ներկայացվել են աշխատավայրում անհատական աշխատանքային բողոքների լուծման ներքին ընթացակարգերի ուղեցույցները։

Դրանք ստեղծվել են  ԱՄԿ «Միասին նպաստենք Հայաստանում աշխատանքային իրավունքների իրացմանը» ծրագրի հետ համատեղ։ Մանրակրկիտ մշակված ուղեցույցները մշակվել են ԱՄԿ արտաքին խորհրդատու, ի․գ․թ․, դոցենտ, փաստաբան Արա Երեմյանի կողմից։

«Ուղեցույցները, որոնք մշակվել են սկզբում հանքարդյունաբերության և առողջապահության ոլորտներում փորձնական կիրառելու նպատակով, առաջարկում են համապարփակ շրջանակ՝ աշխատավայրերում անհատական բողոքների լուծման համար: Դրանք բավականաչափ բազմակողմանի են, և կարող են հարմարեցվել ծառայությունների այլ ոլորտներում կիրառվելու համար՝ բավարարելով տարբեր ոլորտների հատուկ կարիքներն ու պահանջները»,- նշել է Աշխատանքի միջազգային կազմակերպության ծրագրի համակարգող Նվեր Սարգսյանը:

«Անհատական բողոքների կառավարման այլընտրանքային մեխանիզմները նախատեսում են գործատուի և աշխատողի միջև հարաբերությունների պահպանում, ժամանակի և լրացուցիչ ծախսերի խնայողություն, առողջ աշխատանքային միջավայրի ապահովում, արտադրողականության բարձրացում»,- նշել է Հայաստանի գործատուների հանրապետական միության նախագահ Գագիկ Մակարյանը։

Միջոցառումն ուներ առանձնահատուկ կարևորություն՝ աշխատանքային իրավունքների ամրապնդման և հայաստանյան աշխատատեղերում անհատական բողոքների լուծման արդյունավետ մեխանիզմների ստեղծման շարունակական ջանքերում:

«Աշխատավայրում անհատական աշխատանքային բողոքների կամ վեճերի քննարկման այս մեխանիզմը ողջունելի է արհմիությունների կողմից։ Նման մեխանիզմի պրակտիկ կիրառումը իրական սոցիալական գործընկերության և երկխոսության հարթակ կարող է դառնալ։  Մենք հորդորում ենք գործատուներին միանալ ծրագրին և ներդնել մեխանիզմը,  փոխել աշխատանքային  միջավայրը, մշակույթը», - նշել է  Հայաստանի արհմիությունների կոնֆեդերացիայի նախագահի տեղակալ Տիրուհի Նազարեթյանը։

Նշենք, որ միջոցառման ընթացքում առողջապահության ոլորտի երկու կազմակերպություններ հանդես են եկել իրենց կազմակերպություններում անհատական բողոքների մշակման մեխանիզմների կիրառման խնդրանքով։

«Միասին նպաստենք Հայաստանում աշխատանքային իրավունքների իրացմանը» ծրագիրն իրականացվում է ԱՄԿ կողմից և ֆինանսավորվում է ԱՄՆ աշխատանքի դեպարտամենտի կողմից (USDOL)։ Ծրագրի հիմնական նպատակն է հզորացնել աշխատանքային օրենսդրության համապատասխանությունը միջազգայնորեն ընդունված չափորոշիչների հետ, ինչպես նաև բարձրացնել դատական ​​և արտադատական ​​պաշտպանության միջոցների մատչելիությունը Հայաստանում: