ՄԱԿ-ի հայաստանյան գրասենյակ և STARMUS. Համագործակցություն՝ միտված Հայաստանում գիտության հանրայնացմանը
10 հոկտեմբերի 2022
Նկարագրություն՝ STARMUS VI միջազգային փառատոնի բացմանը. Աշխարհահռչակ երաժիշտ և աստղաֆիզիկոս Բրայան Մեյը ստացավ Սթիվեն Հոկինգի մրցանակը՝ գիտության հանրայնացմանը նպաստելու համար։
ՄԱԿ-ի հայաստանյան գրասենյակի և STARMUS փառատոնի համագործակցության արդյունքում ավելի քան 100 երիտասարդ վայելեց Հայաստանում գիտության ու արվեստի օրերը
STARMUS VI միջազգային փառատոնը կապված է Ստիվեն Հոկինգի, Բրայան Մեյի, Ալեքսեյ Լեոնովի և աշխարհահռչակ այլ հայտնի անունների հետ։ Այն 2011 թվականից անցկացվել է Թեներիֆե կղզում (Կանարյան կղզիներ, Իսպանիա), հետագայում նաև Նորվեգիայում, Շվեյցարիայում։ Փառատոնը միավորում է գիտությունը, կրթությունը, արվեստն ու տեխնոլոգիաները և նպատակ ունի հանրայնացնելու գիտությունը մարդկության համար արվեստի միջոցով։
STARMUS փառատոնը հիմնադրվել է աստղաֆիզիկոս Գարիկ Իսրաելյանի և լեգենդար Queen խմբի կիթառահար, աստղաֆիզիկոս Բրայան Մեյի կողմից՝ դառնալով համաշխարհային ճանաչում ունեցող գիտնականներին, Նոբելյան մրցանակակիրներին, տիեզերագնացներին, մտածողներին, գիտության մշակույթի ու արվեստի գործիչներին միավորող հարթակ, որի շրջանակներում նրանք հանրության հետ կիսվում են իրենց գիտելիքներով, փորձով ու նորագույն հայտնագործություններով։
Նկարագրություն՝ Դոկտոր Բրայան Մեյը ստացավ Սթիվեն Հոկինգի մրցանակը՝ գիտության հանրայնացմանը նպաստելու համար
Ձախից աջ՝ Գարիկ Իսրայելյան, Բրայան Մեյ, և "OMEGA" ընկերության ներկայացուցիչը։
«STARMUS-ն այստեղ է՝ ոգեշնչելու հայկական տեխնոլոգիական հսկաների, հայկական ստարտափերի նոր սերնդին: Սա Հայաստանի պատմության առանցքային պահն է՝ STARMUS-ի նման փառատոնը բերելու այս փոքրիկ երկիր և ոգեշնչելու այս երկրի գիտնականների և արվեստագետների նոր սերնդին», - Երևանում STARMUS VI-ի բացման իր ելույթում նշեց փառատոնի համահիմնադիր Գարիկ Իսրայելյանը։
Ինչպե՞ս արվեստի միջոցով հանրայնացնել գիտությունը հայ հասարակության շրջանում։
Ի՞նչ անել երիտասարդների շրջանում գիտության նկատմամբ հետաքրքրությունը ավելացնելու համար։
Ինչպե՞ս նրանց մասնակից դարձնել աշխարհի ամենահեղինակավոր ու պահանջված գիտության և արվեստի փառատոններից մեկի՝ STARMUS-ի։
Այս և շատ այլ հարցերի պատասխաններ փորձեցինք գտնել STARMUS միջազգային փառատոնի մեր գործընկերների հետ քննարկումների ընթացքում։ Արդյունքում 2022-ի օգոստոսին ՄԱԿ-ի հայաստանյան գրասենյակը և STARMUS միջազգային փառատոնը փոխըմբռնման հուշագիր ստորագրեցին, որի համաձայն ՄԱԿ-ը դարձավ Հայաստանում STARMUS VI փառատոնի գործընկեր կառույց։ Սա նշանակում է, որ կողմերը պետք է միավորեին ջանքերը Հայաստանում գիտության հանրայնացման և հաղորդակցության ուղղությամբ՝ դրանով իսկ ապահովելով STARMUS փառատոնի հիմնական նպատակը՝ ոգեշնչել և կրթել հետազոտողների սերունդ և վերագտնել հայտնագործելու ձգտումը։
Նկարագրություն՝ ՄԱԿ-ի հայաստանյան գրասենյակի և STARMUS միջազգային փառատոնի կողմից ստորագրված փոխըմբռնման հուշագրի համաձայն ՄԱԿ-ը դարձավ Հայաստանում STARMUS VI փառատոնի գործընկեր կառույց։
Ձախից աջ՝ աստղաֆիզիկոս, STARMUS VI Armenia փառատոնի համահիմնադիր Գարիկ Իսրայելյանը և ՀՀ-ում ՄԱԿ-ի մշտական համակարգողի պաշտոնակատար Լիլա Փիթրս Յահիան։
Գիտության ու արվեստի օրերը Հայաստանում նշվեցին 2022 թվականի սեպտեմբերի 5-ից 10-ը՝ «STARMUS VI. 50 տարի Մարսի վրա» խորագրով։ Փառատոնը նվիրված էր Մարսի վրա Մարս 3 տիեզերակայանի առաջին փափուկ վայրէջքի 50-ամյակին: STARMUS VI գիտության և արվեստի փառատոնի ընթացքում անցկացվեցին մի շարք համագումարներ ու գիտաժողովներ, բազմաբնույթ մշակութային միջոցառումներ, գիտական ճամբար:
ՄԱԿ-ի հայաստանյան գրասենյակի և STARMUS միջազգային փառատոնի համագործակցության շրջանակներում ՄԱԿ-ի հայաստանյան գրասենյակի Հաղորդակցության ղեկավար Արմինե Պետրոսյանը հանդես եկավ որպես STARMUS գիտության և արվեստի համաշխարհային փառատոնի դեսպան:
Նկարագրություն՝ ՄԱԿ-ի հայաստանյան գրասենյակի Հաղորդակցության ղեկավար Արմինե Պետրոսյանը հանդես եկավ որպես STARMUS գիտության և արվեստի համաշխարհային փառատոնի դեսպան:
ՄԱԿ-ի գործակալությունների ծրագրերի շահառու ավելի քան 100 երիտասարդ՝ Երևանից, մարզերից, տեղահանված ու սահմանամերձ համայնքներից, հնարավորություն ունեցան մասնակցելու համաշխարհային ճանաչում ունեցող գիտնականների, երաժիշտների ու արվեստագետների մասնակցությամբ անցկացվող միջոցառումներին։
Ուրախ ենք, որ իրականություն դարձավ ՄԱԿ-ի Փախստականների գործակալության (ՄԱԿ ՓԳՀ) ծրագրերից մեկի շահառու երիտասարդներից Տաթև Հակոբյանի երազանքը, որի մասին նա բարձրաձայնել էր դեռևս ամռանը մեր թիմի Սյունիք կատարած այցի ընթացքում։ Տաթևը, ով իր ապագան տեսնում է աստղագիտության ոլորտում, կիսվել է STARMUS-ին մասնակցության տպավորություններով:
Նկարագրություն՝ ՄԱԿ-ի Փախստականների գործակալության (ՄԱԿ ՓԳՀ) ծրագրերից մեկի շահառու երիտասարդներից Տաթև Հակոբյանը։
«Փոքր տարիքից հետաքրքրվել եմ աստղագիտությամբ և սա ուղղակի շատ մեծ հնարավորություն էր ինձ համար՝ ստանալ ինձ հուզող հարցերի պատասխանները և լսել հրաշալի դասախոսություններ պրոֆեսիոնալ դասախոսների կողմից։ Իրականում այս ամենը շատ մեծ մոտիվացիայի աղբյուր էր ինձ համար»։
Մինչ օրս շարունակում ենք ստանալ ոգևորիչ արձագանքներ մեր գործընկերներից, ովքեր փոխանցում են փառատոնին մասնակցած շահառու երիտասարդների կարծիքը.
«Դեռահասների և երիտասարդների անունից շնորհակալություն եմ հայտնում, որ հնարավորություն տվեցիք դառնալ STARMUS-ի անմոռանալի գիտակրթական և մշակութային օրերի մասնիկը: Անընդհատ զանգեր և հաղորդագրություններ եմ ստանում երիտասարդներից, ովքեր շնորհակալություն են հայտնում այս հաճելի և ոգևորիչ փորձի համար»:
Նկարագրություն՝ STARMUS VI փառատոնին մասնակցած ՄԱԿ-ի գործակալությունների ծրագրերի շահառու երիտասարդներից մի քանիսը ՄԱԿ-ի հայաստանյան գրասենյակի աշխատակիցների հետ։
Երիտասարդները հնարավորություն ունեցան վայելելու գիտության ու արվեստի օրերը, սովորել և ոգեշնչվել՝ վստահեցնելով, որ հետագայում իրենց ներդրումը կունենան գիտության, կրթության, արվեստի ու տեխնոլոգիաների զարգացման հարցում։
Մեր համագործակցության շրջանակներում աստղակենսաբան, բազմաթիվ մրցանակների արժանացած գիտնական և հեղինակ Դեյվիդ Գրինսփունը ՄԱԿ-ի հայաստանյան գրասենյակում հանդես եկավ Երկիր մոլորակի վրա մարդկության դերի մասին դասախոսությամբ:
Նկարագրություն՝ Աստղակենսաբան, բազմաթիվ մրցանակների արժանացած գիտնական և հեղինակ Դեյվիդ Գրինսփունը ՄԱԿ-ի հայաստանյան գրասենյակում հանդես եկավ դասախոսությամբ:
Աստղակենսաբանը անդրադարձավ տիեզերքում տեղի ունեցող փոփոխությունների պատճառների բացահայտման կարևորությանը, տարբեր մոլորակների վրա տեղի ունեցած կլիմայական աղետներին ու դրանց հետևանքներին, կլիմայի փոփոխության և դրա ազդեցությունների դեմ պայքարելու միջազգային համագործակցությանը։ Դասախոսությանը հաջորդեց քննարկում՝ զարգացման, Երկիր մոլորակում հավանական փոփոխությունների մասին։
Նկարագրություն՝ Աստղակենսաբան, բազմաթիվ մրցանակների արժանացած գիտնական և հեղինակ Դեյվիդ Գրինսփունը ՄԱԿ-ի հայաստանյան գրասենյակում:
Վստահ ենք՝ երկարաժամկետ հեռանկարում ավելի տեսանելի կլինեն STARMUS VI փառատոնի ընձեռնած հնարավորությունների անգերազանցելի արդյունքները։
ՄԱԿ-ի հայաստանյան գրասենյակն էլ, իր հերթին, մշտապես կսատարի այն նախաձեռնություններին, որոնք կնպաստեն երիտասարդների հզորացմանը, գենդերային հավասարությանը, ՍՏԵՄ (գիտություն, տեխնոլոգիա, ճարտարագիտություն և մաթեմատիկա) կրթության տարածմանը, քանի որ բոլորը կենսական նշանակություն ունեն միջազգայնորեն համաձայնեցված Կայուն զարգացման նպատակներին հասնելու ու ավելի լավ աշխարհ ունենալու համար՝ չանտեսելով ոչ ոքի:
Հեղինակ՝
Անի Դավթյան
Հաղորդակցության գծով օգնական
Այս նախաձեռնությանը մասնակցող ՄԱԿ-ի գործակալությունները
ՊԳԿ
Պարենի և գյուղատնտեսության կազմակերպություն
ՄԱՁԻԱՀ
ՄԱԿ-ի ՄԻԱՎ/ՁԻԱՀ-ի հարցերի համատեղ ծրագիր
ԳՀՎ
Գլոբալ հաղորդակցությունների վարչություն
ՄԱԶԾ
ՄԱԿ-ի Զարգացման ծրագիր
ՄԱԲՀ
ՄԱԿ-ի Բնակչության հիմնադրամ
ՄԱՓԳՀ
ՄԱԿ-ի Փախստականների հարցերով գերագույն հանձնակատարի գրասենյակ
ՄԱՏԿ
ՄԱԿ-ի Տեղեկատվական կենտրոն
ՅՈՒՆԻՍԵՖ
ՄԱԿ-ի մանկական հիմնադրամ
Նպատակները, որոնց մենք աջակցում ենք այս նախաձեռնությամբ
