ԱՄՆ ՄԶԳ-ն և ՅՈՒՆԻՍԵՖ-ը շարունակում են աջակցել Հայաստանին՝ ՔՈՎԻԴ-19 համավարակի հաղթահարման գործում

Ծրագիրը տևելու է մեկ տարի: Նպատակն է կանխարգելել Նոր կորոնավիրուսի տարածումը Հայաստանում, աջակցել առողջապահության համակարգին անհրաժեշտ սարքավորումներով և պարագաներով, զինել բուժաշխատողներին անհրաժեշտ գիտելիքներով, իսկ ընտանիքներին տրամադրել վստահելի տեղեկատվություն:

«COVID-19 համավարակը մարտահրավեր նետեց աշխարհի գրեթե բոլոր առողջապահական համակարգերին: Մինչ բուժաշխատողները անձնուրաց կերպով շարունակում են պայքարել առաջնագծում, բոլորս պետք է համախմբվենք, որպեսզի կոտրենք վարակի շղթան և ապահովենք առողջապահական ծառայությունների շարունակականությունը», - ասաց ԱՄՆ ՄԶԳ հայաստանյան առաքելության տնօրեն Դեբորա Գրիզերը:

Ծրագրի միջոցներով ՅՈՒՆԻՍԵՖ-ն արդեն իսկ գնել և առողջապահության նախարարությանն է տրամադրել COVID-19 համավարակի ախտորոշման 10.000 թեստ, 24 թթվածնային սարք և 2000 քթային խողովակ: Տեխնիկական այս բոլոր միջոցներն, ըստ նպատակահարմարության և անհրաժեշտության, ՀՀ Առողջապահության նախարարությունը տրամադրում է Քովիդ-19-ով վարակված պացիենտներին սպասարկող բուժհաստատություններին։

«Պետք է անհապաղ գործենք, որպեսզի առողջապահական ճգնաժամը չդառնա երեխայի իրավունքների ճգնաժամ: Բոլոր երկրներում Նոր կորոնավիրուսային համավարակով պայմանավորված իրավիճակը խաթարել է երեխաների բարեկեցությունը, անվտանգությունն ու վտանգել նրանց ապագան: Միմիայն արդյունավետ համագործակցության շնորհիվ կարող ենք ապահովել, որպեսզի հայ աղջիկներն ու տղաները լինեն առողջ, շարունակեն իրենց կրթությունն ու մեծանան ներդաշնակ միջավայրում»,-Լիվ Էլին Ինդրեյթենը՝ Հայաստանում ՅՈՒՆԻՍԵՖ-ի ներկայացուցչի պաշտոնակատարը։

Ծրագրի միջոցներով շուտով ՀՀ հինգ մարզերում (Լոռի, Շիրակ, Տավուշ, Արագածոտն, Գեղարքունիք), իսկ այնուհետև մնացած բոլոր մարզերում հիգիենայի պահպանման համար անհրաժեշտ սարքերով՝ 500 դիսպենսերներով կապահովվեն առաջնային առողջապահական հաստատություններն ու ծննդատները: Դիսպենսեր սարքերը հարմար են ինչպես հեղուկ օճառի, այնպես էլ ալկոհոլային հիմքով ձեռքի քսուքների արդյունավետ օգտագործման համար:

 

Մայրաքաղաքի ու մարզերի հիվանդների արագ և արդյունավետ բուժօգնությունը կազմակերպելու համար նաև ձեռք են բերվելու հինգ թվային շարժական ռենտգեն համակարգեր, որոնց նշանակությունը խիստ կարևոր է համավարակի վերահսկման ու կանխարգելման գործում:

 

ՅՈՒՆԻՍԵՖ-ի և ԱՀԿ-ի ուղեցույցերի հիման վրա արդեն իսկ տեղայնացվել ու մշակվել են տնայցերի, երեխայի խնամքի և առողջության, իմունականխարգելման և սնուցման թեմաներով վերապատրաստումների մոդուլներ, որոնք գործի են դրվել հուլիս ամսին և կընդգրկեն բոլոր մարզերի, ներառյալ Երևանի, մոտ երեք հազար բուժաշխատողների՝ այդ թվում ընտանեկան բժիշկներ, մանկաբույժներ, բուժքույրեր:

 

Առողջապահության նախարարի տեղակալ Լենա Նանուշյանն ընդգծել է, որ իրականացվող համալիր միջոցառումները կարող են ցանկալի արդյունք ապահովել COVID-19-ի դեմ պայքարում:

«Շնորհակալ ենք մեր գործընկերերին համաճարակի ժամանակ ցուցաբերվող աջակցության համար` ոչ միայն բժշկական սարքավորումների տրամադրման առումով, այլև տեխնիկական հարցերով մասնագիտական աջակցության համար, ինչը ի սպաս է դրվում կորոնավիրուսային հիվանդության համաճարակին արդյունավետ հակազդելու հարցում», - ասել է փոխնախարարը:

Տեխնիկական անհրաժեշտ սարքավորումներով ապահովելուց զատ, ԱՄՆ ՄԶԳ և ՅՈՒՆԻՍԵՖ-ի ծրագրում կարևոր տեղ է զբաղեցնում տեղեկատվական, իրազեկման աշխատանքների միջոցով մարդկանց աջակցել կանխելու համավարակի տարածումը, հաղթահարելու առաջացած հոգեբանական խնդիրները, որոնց պատճառը, հաճախ, մասնագիտական, ստուգված և հիմնավոր տեղեկատվության պակասն է:

 

ՅՈՒՆԻՍԵՖ-ի հայաստանյան գրասենյակն իր տեղեկատվական բոլոր հարթակներն ակտիվացնում է /www.unicef.am/կորոնավիրուս և www.babycef.am/, հանրությանը պարզ, մատչելի, ճշգրիտ մասնագիտական տեղեկատվություն ապահովելու համար: Մեր հարթակներում կարող եք տեղեկանալ այն ամենի մասին, ինչն անհրաժեշտ է համավարակի շրջանում հնարավորինս պաշտպանված լինելու համար:

 

ՄԱԿ-ի Մանկական հիմնադրամի հայաստանյան գրասենյակի և ՀՀ Առողջապահության նախարարության մշակած տեղեկատվությամբ, ուղեցույցերով, տեսանյութերով ու իրազեկման մյուս միջոցներով կփորձենք պատասխանել հարցերի, որոնք առնչվում են COVID-19 համավարակի պայմաններում կրծքով կերակրմանը, նորածինների և մանկահասակ երեխաների սննդին, տնային այցերի պրակտիկային, ձեռքի և շնչառական հիգիենային, անվտանգ պատվաստմանն ու կօգնեն պաշտպանված լինել թե՛  կրծքով կերակրող մայրերին, թե՛ թոռնիկներին զբոսանքի տանող տարեցներին։