ՀՀ առողջապահության նախարարությունը, ԱՀԿ-ն և միջազգային գործընկերները Հայաստանում ընդլայնում են աջակցությունն ու ջանքերը՝ ուղղված երկրում առաջնային առողջության պահպանման ոլորտի հզորացմանը

Առողջության առաջնային պահպանման մեջ ներդրումներն ամենաարդյունավետ միջոցներից են՝ ապահովելու առողջապահական ծառայությունների հասանելիությունն ու մատչելիությունը, բարելավելու առողջապահական համակարգի արդյունավետությունը և զարգացնելու հաշվետվողականություն՝ առողջապահության ոլորտում նոր ձեռքբերումների համար։

Հանդիպումը համախմբեց տարբեր մասնակիցների, այդ թվում՝ պետական պաշտոնյաների, առողջապահական ծառայություններ տրամադրողների, միջազգային գործընկերների, մարզպետարանների ներկայացուցիչների, ազգային և միջազգային փորձագետների, որոնք քննարկեցին աշխատանքների և ներդրումների ներդաշնակեցումը հանուն Հայաստանում համապարփակ առողջապահական ծածկույթի (ՀԱԾ) առաջխաղացման՝ ԱԱՊ հասանելի և դիմակայուն ծառայությունների միջոցով։

Առողջապահության նախարարի տեղակալ դոկտոր Արտակ Ջումայանը նշեց. «Առողջության առաջնային պահպանման օղակի ճիշտ կազմակերպված աշխատանքից է բխում հիվանդանոցային և այլ օղակների բնականոն աշխատանքը։ Հասկանալով առկա բոլոր խնդիրները՝ մենք ընտրել ենք այս ոլորտի բարեփոխումների ուղին և մեր միջազգային գործընկերների հետ միասին պետք է հաղթահարենք խոչընդոտները և ունենանք մեր երազած լավ առաջնային օղակը»։

Քաղաքականության շուրջ երկխոսությունը Առողջապահության նախարարության, ԱՀԿ ԱԱՊ եվրոպական կենտրոնի և ԱՀԿ Հայաստանի ևս մեկ համատեղ նախաձեռնություն է 2021 թվականից ի վեր Հայաստանում ԱԱՊ բարեփոխումներն առաջ մղելու ռազմավարական աշխատանքների շարքում: Մինչ օրս գրանցված արդյունքները ներառում են Հայաստանին համապատասխան, արդյունավետ գործող ԱԱՊ մոդելների և ԱԱՊ օղակի բարելավման ազգային կարողությունների հզորացումը, երկրների միջև լավագույն փորձի փոխանակման խթանումը, ինչպես նաև Հայաստանի համար ԱԱՊ նոր մոդելի մշակմանն ուղղված աշխատանքները:

Գնահատելով Առողջապահության նախարարության կողմից մինչ օրս Հայաստանում ԱԱՊ օղակի առաջխաղացմանն ուղղված ջանքերը՝ Հայաստանում ԱՀԿ ներկայացուցիչ դոկտոր Սիդարթա Դատտան վերահաստատեց ԱԱՊ օղակի կարևորությունը՝ որպես արդյունավետ և արդար առողջապահական համակարգի հիմք և համապարփակ առողջապահական ծածկույթի ապահովման անկյունաքար։

«ԱԱՊ օղակի բարելավմանն ուղղված ներդրումներն ու ջանքերը խթանելու համար շահագրգիռ կողմերին համախմբելու նպատակն է ոչ միայն առողջապահական արդյունքների բարելավումը, այլ նաև արդար և արդյունավետ առողջապահական համակարգերի մշակումը, որոնք կարող են ծառայություններ տրամադրել բոլորին, հատկապես ամենախոցելիներին, որտեղ և երբ նրանք դրա կարիքն ունեն:

ԱՀԿ-ն հանձնառու է աջակցել Հայաստանի քայլերին ուղղված համապարփակ առողջապահական ծածկույթի ապահովմանը, և մենք պատրաստակամ ենք շարունակել աշխատել Առողջապահության նախարարության և մեր գործընկերների՝ Համաշխարհային բանկի, Ասիական զարգացման բանկի, ՀԱԾ գործընկերության անդամների և Լիտվայի հետ, ի թիվս այլոց», - ասաց դոկտոր Դատտան՝ դիմելով մասնակիցներին:

ԱՀԿ ԱԱՊ եվրոպական կենտրոնի առաջատար փորձագետների թիմի աջակցությամբ՝ մասնակիցները քննարկեցին Հայաստանում քաղաքային և գյուղական բնակավայրերում բուժօգնության համապատասխան և հարմարեցված մոդելների նախագծման և ճանապարհային քարտեզի մշակումը:

Գործընկեր կազմակերպությունների, այդ թվում՝ Համաշխարհային բանկի, Ասիական զարգացման բանկի, Եվրոպական միության, ՄԱԿ-ի հայաստանյան գործակալությունների և մասնակից այլ շահագրգիռ կողմերի ներկայացուցիչները նշեցին իրենց տեսակետները առաջընթացի և խոչընդոտների վերաբերյալ։

Առողջապահության նախարարությունը, ԱՀԿ-ն և մյուս գործընկերները վերահաստատեցին իրենց հանձնառությունը բուժօգնության մոդելի ներդրման գործնական ճանապարհային քարտեզի ստեղծման հարցում շարունակական երկխոսություն և գործընկերություն ծավալելու վերաբերյալ՝ հաստատելով, որ ԱԱՊ լավ գործող համակարգը կարևոր է ոչ միայն բնակչության առողջապահական կարիքները բավարարելու համար, այլ նաև առանցքային ներդրում է Հայաստանի տնտեսության և հասարակության համար:

Քաղաքականության երկխոսությունն իրականացվում է ՀԱԾ - Գործընկերություն նախաձեռնության միջոցով, որը ԱՀԿ-ի միջազգային համագործակցության ամենամեծ հարթակներից է համապարփակ առողջապահական ծածկույթի ապահովումը խթանելու համար։