«ՄԱԿ-ի իմ գործընկերների հետ այցելեցինք Գավառ, Շատվան, Նորաբակ, Կութ, Սոթք։ Ականատես եղա մարդկանց՝ տղամարդկանց, կանանց, երիտասարդների և երեխաների մեծ տխրությանն ու տառապանքին. շատերը նախկինում ևս բախվել են համայնքների, ապրուստի միջոցների և տների կորստի հետ: Խորապես տպավորված եմ բնակիչների տոկունությունից և իրենց երկրում խաղաղ և անվտանգ ապրելու համար իրենց իրավունքները պաշտպանելու կոչերից», - նշեց Լիլա Փիթրս Յահիան:
Գեղարքունիքի մարզ կատարած այցի շրջանակներում ՄԱԿ-ի թիմը հանդիպել է ՀՀ Գեղարքունիքի մարզպետ Կարեն Սարգսյանի և Վարդենիս համայնքի ղեկավար Ահարոն Խաչատրյանի հետ՝ ծանոթանալու տուժած բնակավայրերում տիրող իրավիճակին։
Նկարագրություն՝ Գեղարքունիքի մարզ կատարած այցի շրջանակներում ՄԱԿ-ի թիմը հանդիպել է ՀՀ Գեղարքունիքի մարզպետի և Վարդենիս համայնքի ղեկավարի հետ։
ՄԱԿ-ի թիմին տրամադրվել է տուժած ենթակառուցվածքների ծավալների, ներառյալ ճանապարհների, գազատարների, էլեկտրամատակարարման և ջրամատակարարման համակարգերի մասին տեղեկատվություն, ինչպես նաև մանրամասներ՝ ինչպես է տուժած բնակչությունը ստիպված լքել իրենց տներն ու համայնքները՝ անվտանգ ապաստան գտնելու համար:
Նկարագրություն՝ ՀՀ Գեղարքունիքի մարզպետ Կարեն Սարգսյանը և Վարդենիս համայնքի ղեկավար Ահարոն Խաչատրյանը ՄԱԿ-ի թիմին են տրամադրել տուժած ենթակառուցվածքների ծավալների մասին տեղեկատվություն։
Մարզպետը ՄԱԿ-ի թիմին տեղեկացրել է, որ անցյալ շաբաթվա ընթացքում 2077 երեխա ստիպված է եղել ընդհատել ուսումը, իսկ ֆերմերները կանգնած են ընթացիկ բերքը կորցնելու և հաջորդ սերմնացանի շրջանը բաց թողնելու վտանգի առաջ։ Հաղորդվել է նաև ՀՀ կառավարության կողմից ձեռնարկվող բյուջետային միջոցների շարունակական վերաբաշխման մասին՝ միտված աջակցելու տեղական իշխանություններին մինչև ձմեռ վնասված ենթակառուցվածքները վերանորոգելու հարցում, ինչը հնարավորություն կտա մարդկանց վերադառնալ և ապրել իրենց տներում ու համայնքներում:
Կողմերը քննարկել են նաև տուժած անձանց, այդ թվում՝ երեխաներին, կանանց և խոցելի խմբերին ուղղված նպատակային աջակցության տրամադրումը։
***
Սյունիքի մարզ կատարած այցի ընթացքում Կապանում ՄԱԿ-ի մշտական համակարգողի պաշտոնակատար Լիլա Փիթրս Յահիայի գլխավորությամբ ՄԱԿ-ի հայաստանյան գրասենյակի թիմը հանդիպել է հասարակական կազմակերպությունների ներկայացուցիչների հետ։ Հանդիպումը կայացել է Կապանի ՄԻՊ ստորաբաժանման գրասենյակի հետ համագործակցության շնորհիվ։
Հասարակական կազմակերպությունների ներկայացուցիչների կողմից կոչ է արվել ուժեղացնել անվտանգությունն ու ապահովությունը և նպաստել կանանց ներգրավվածությանը խաղաղության և անվտանգության գործընթացներում՝ համաձայն ՄԱԿ-ի Անվտանգության խորհրդի Կանայք, խաղաղություն և անվտանգություն N 1325 բանաձևի։
Նկարագրություն՝ Սյունիքի մարզ կատարած այցի ընթացքում Կապանում ՄԱԿ-ի հայաստանյան գրասենյակի թիմը հանդիպել է հասարակական կազմակերպությունների ներկայացուցիչների հետ։
Նկարագրություն՝ Հասարակական կազմակերպությունների ներկայացուցիչների հետ հանդիպումը կայացել է Կապանի ՄԻՊ ստորաբաժանման գրասենյակի հետ համագործակցության շնորհիվ։
Այցի շրջանակներում Սյունիքի մարզպետ Ռոբերտ Ղուկասյանը ՄԱԿ-ի թիմին է ներկայացրել զարգացման փոփոխված առաջնահերթությունները, քննարկել ստեղծված իրավիճակում մարզի անվտանգությանը, խոցելի խմբերի պաշտպանվածությանն ու տարբեր ինստիտուտների անխափան գործունեությանը վերաբերող հարցեր։ Հանդիպման ընթացքում քննարկվել են նաև կրթական գործընթացի կազմակերպման, ներքին տեղահանվածների, առողջապահական համակարգի, առաջնային բուժօգնության, պարենային անվտանգության և այլ խնդիրներ։
Կողմերը պայմանավորվել են շարունակել այն ծրագրերի իրականացումը, որոնց վերաբերյալ նախորդ հանդիպումների ընթացքում համաձայնություններ են ձեռք բերվել։
Նկարագրություն՝ Սյունիքի մարզ կատարած այցի ընթացքում ՄԱԿ-ի հայաստանյան գրասենյակի թիմը հանդիպել է Սյունիքի մարզպետ Ռոբերտ Ղուկասյանին։
Ամփոփելով ՄԱԿ-ի հայաստանյան գրասենյակի թիմի Սյունիքի մարզ կատարած այցը՝ Հայաստանում ՄԱԿ-ի մշտական համակարգողի պաշտոնակատար Լիլա Փիթրս Յահիան նշում է.
«Տեղական իշխանությունները տոկուն են և հաստատակամ՝ պահպանելու իրենց համայնքների անվտանգությունը, ապահովությունը, զարգացումն ու բարեկեցությունը: Նրանք պատրաստ են ներդրումներ կատարել՝ իրենց համայնքների պատրաստվածության և ինքնապահովման մակարդակի բարձրացման համար: Մարդիկ, ներառյալ կանայք և տարեցները, ցանկանում են ներգրավվել խաղաղության գործընթացներում և իրացնել իրենց իրավունքը՝ տեսնելու իրենց երեխաների ու թոռների աճն ու զարգացումը»։
***
Վայոց ձորի մարզ կատարած այցի ընթացքում ՄԱԿ-ի հայաստանյան գրասենյակի թիմը՝ ՄԱԿ-ի մշտական համակարգողի պաշտոնակատար Լիլա Փիթրս Յահիայի գլխավորությամբ, հանդիպել է մարզպետ Արարատ Գրիգորյանին, ով ներկայացրել է մարզում ստեղծված իրավիճակը՝ Ջերմուկի համայնքային ենթակառուցվածքների, առողջարանների, մասնավոր կառույցների և բնակչության կրած վնասները:
Նկարագրություն՝ Վայոց ձորի մարզ կատարած այցի ընթացքում ՄԱԿ-ի հայաստանյան գրասենյակի թիմը հանդիպել է մարզպետ Արարատ Գրիգորյանին:
Հանդիպման ընթացքում ՄԱԿ-ի տարբեր գործակալությունների հայաստանյան գրասենյակների ղեկավարների հետ քննարկվել են մարզի անվտանգության, խոցելի խմբերի պաշտպանվածության, տարբեր ինստիտուտների անխափան գործունեության, ինչպես նաև կրթական գործընթացի կազմակերպման, այլ համայնքներ տեղափոխվածների, առողջապահական համակարգի, առաջնային բուժօգնության, պարենային անվտանգության ու այլ թեմաների վերաբերյալ հարցեր: Այցի շրջանակներում ՄԱԿ-ի թիմը նաև հանդիպումներ է ունեցել տարբեր ոլորտների ներկայացուցիչների հետ։
