ՄԱԿ-ի ՄԻԱՎ/ՁԻԱՀ միացյալ ծրագրի աջակցությամբ տեղի ունեցավ «Մեթադոնային փոխարինող բուժման ընդլայնումը ՀՀ-ում» խորագրով աշխատաժողովը

Հուլիսի 8-ին ՄԱԿ-ի ՄԻԱՎ/ՁԻԱՀ միացյալ ծրագրի աջակցությամբ «Իրական Աշխարհ, Իրական Մարդիկ» ՀԿ-ն նախաձեռնել էր «Մեթադոնային փոխարինող բուժման ընդլայնումը ՀՀ-ում» խորագրով աշխատաժողով: Միջոցառմանը ներկա էին ինչպես ոլորտի պատասխանատուներ, այնպես էլ քաղաքացիական հասարակության  ներկայացուցիչներ:

Աշխատաժողովը մեկնարկեց «Իրական Աշխարհ, Իրական Մարդիկ» ՀԿ-ն նախագահ Ժենյա Մայիլյանի ողջույնի խոսքով, համաձայն որի  դեռևս 2019 թ. կազմակերպությունը Գլոբալ հիմնադրամի ֆինանսական աջակցությամբ մեկնարկել էր ԹՆՕ-ների շրջանում ՄԻԱՎ վարակի կանխարգելում ծրագիրը։ 2021 թվականին  ՄԱԿ-ի ՄԻԱՎ/ՁԻԱՀ-ի միացյալ ծրագիրը լրացուցիչ հնարավորություն ստեղծեց ի լրումն արդեն գործող ծրագրերի ընդլայնել Մեթադոնային փոխարինող բուժման ծածկույթը և ներդնել համաճարակային և արտակարգ իրավիճակներում վերը նշված անձանց ծառայությունների տրամադրման հավելյալ մեխանիզմներ։

Խոսելով ծրագրի նպատակի մասին՝ ՄԱԿ-ի ՄԻԱՎ/ՁԻԱՀ-ի հարցերի միացյալ ծրագրի Հայաստանյան գրասենյակի համակարգող Ռոզա Բաբայանն ասաց, որ իրենք կարևորում են բոլոր թիրախային խմբերի համար որակյալ ծառայությունների հասանելիության ապահովումը:

 «Մենք պետք է օգտագործենք բոլոր հնարավորությունները, որպեսզի հետագայում մեր շահառուների համար ծառայություններն առավել հասանելի դարձնենք և ունենանք գործուն մեխանիզմներ հատկապես համաճարակներով պայմանավորված  արտակարգ իրավիճակներում որակյալ առողջապահական ծառայությունները տրամադրելու համար: Նշեմ նաև, որ այս ծրագրի շրջանակում իրականացված հետազոտությունը հնարավորություն տվեց անդրադառնալ մի շարք իրավական խոչընդոտների և առկա անհավասարությունների ու խնդիրների, որոնց առկայությունը դեռևս խոչընդոտում է ծառայությունները էլ ավելի հասանելի դարձնելուն։ Մենք աննախադեպ հնարավորություն ունենք այժմ միասին վերջ դնելու համաճարակներին՝ ձևավորելով գործուն մեխանիզմներ՝ հասանելի դարձնելով որակյալ առողջապահական  ծառայությունների տրամադրումը», - վստահեցրեց Ռ. Բաբայանը:

ՀՀ ԱՆ Գլոբալ հիմնադրամի ծրագրերի համակարգող և ղեկավար Հասմիկ Հարությունյանը, ողջունելով ներկաներին, իր խոսքում ընդգծեց, որ ՄՓԲ ծրագիրը հիմնադրամի կողմից ֆինանսավորվող ամենաարդյունավետ ծրագրերից է։ Նա շեշտեց, որ ներկայումս ՀՀ առողջապահության նախարարության կողմից աշխատանքներ են իրականացվում միջնաժամկետ ծախսային ծրագրերում բուժումը ներառելու հարցը։ 

Համաձայն Կախվածությունների բուժման ազգային կենտրոնի կողմից  ներկայացված տվյալների՝ 2020-21 թթ.-ի ընթացքում «Իրական Աշխարհ, Իրական Մարդիկ» ՀԿ-ի հետ համագործակցության արդյունքում կենտրոնը իրականացրել է ՄԻԱՎ-ի նկատմամբ թեստավորումներ և խորհրդատվություններ թմրամիջոց գործածող անձանց շրջանում: 2020 թվականին նրանց թիվը կազմել է 151, իսկ 2021 թվականին 188»:

Նշենք նաև, որ վերջին 3 տարիների ընթացքում ՀԿ-ի կողմից իրականացվող ծրագրերի շրջանում ՄԻԱՎ-ի վերաբերյալ թեստավորվել է 15 հազար 101 անձ, որոնցից 85-ի մոտ հաստատվել է ՄԻԱՎ դրական կարգավիճակ՝ 66-ը ուղեգրվել են Ինֆեկցիոն հիվանդությունների ազգային կենտրոն (թարմացված տվյալները հասանելի են www.ncid.am)։ 

Ամփոփվեցին նաև ՄԱԿ-ի ՄԻԱՎ/ՁԻԱՀ միացյալ ծրագրի աջակցությամբ իրականացված «Ընդլայնել ՄՓԲ ծածկույթը ՀՀ-ում և ներդնել ՄՓԲ փոխանցման մեխանիզմներ COVID-19 ազդեցությունը մեղմելու համար» ծրագրի արդյունքները։ Արձանագրվեց, որ ծրագիրը հաջողել է, ինչը փաստում են նաև արդյունքները՝  ՄՓԲ ծրագրի աջակցությամբ կցված 101 անձից, ներկայումս շարունակում են բուժումը 92-ը։ Այդ ժամանակահատվածում 101 շահառուի տրամադրվել է սոցիալ-հոգեբանական 301 խորհրդատվություն։

Զեկույցներին հաջորդեց հարցուպատասխան, որի ընթացքում մասնակիցները մասնագետներին ուղղեցին իրենց հետաքրքրող հարցերն ու հանդես եկան տարբեր առաջարկություններով ոլորտում բարեփոխումներ իրականացնելու համար: