«Նորդիկ օրեր 2026». քննարկում կանանց իրավունքների և հավասար հնարավորությունների մասին

Երևան, 12 հունիսի 2026 թ. - «Նորդիկ օրեր 2026» ծրագրի շրջանակում անցկացված պանելային քննարկման ընթացքում քննարկվել են կանանց իրավունքների պաշտպանության ոլորտում առկա հիմնական մարտահրավերներն ու առաջնահերթությունները։

Քննարկումը վարել է Հայաստանում ՄԱԿ-ի մշտական համակարգող Ֆրանսուազ Ժակոբը՝ կարևորելով ներառական երկխոսության դերը կանանց իրավունքների առաջխաղացման գործում և ընդգծելով ՄԱԿ-ի շարունակական հանձնառությունը՝ աջակցելու գենդերային հավասարությանը Հայաստանում։

Մարդու իրավունքների պաշտպան Անահիտ Մանասյանը հանդես է եկել ելույթով՝ նշելով, որ կանանց և աղջիկների համար հավասար հնարավորությունների ապահովման ճանապարհին շարունակում են լուրջ խոչընդոտ մնալ հասարակության մեջ պահպանվող կարծրատիպերը՝ կապված կանանց և տղամարդկանց սոցիալական դերերի հետ։

Պաշտպանը նաև անդրադարձել է ազգային փոքրամասնություններով բնակեցված համայնքներում վաղ ամուսնությունների խնդրին՝ ընդգծելով, որ այն բացասաբար է անդրադառնում աղջիկների կրթության, զարգացման և այլ հիմնարար իրավունքների իրացման վրա։

Առանձին շեշտադրում է արվել մարդու իրավունքների կրթության կարևորության վրա։ Անահիտ Մանասյանի խոսքով՝ Հայաստանում, մասնավորապես բարձրագույն կրթության համակարգում, մարդու իրավունքների կրթությունը դեռևս չի համապատասխանում ժամանակակից միջազգային չափանիշներին, ինչն անհրաժեշտ է բարեփոխել։

Քննարկմանը մասնակցել են նաև Հայաստանում Եվրոպական միության դիտորդական առաքելության ղեկավար Սատու Կոյվուն և «Կանանց ռեսուրսային կենտրոն» հասարակական կազմակերպության տնօրեն Լարա Ահարոնյանը։