ԵՄ-ի և ՄԱԱԶԿ-ի համագործակցությունը Հայաստանի չափագիտության ենթակառուցվածքը զարգացնելու նպատակով

Կարմիր ժապավենի կտրման արարողությանը մասնակցեցին ՀՀ էկոնոմիկայի նախարարության, ԵՄ պատվիրակության, ՄԱԱԶԿ-ի և պետական ու մասնավոր հատվածի բազմաթիվ ներկայացուցիչներ։ Միջոցառման հյուրերի թվում էին նաև համապատասխան կառույցների ներկայացուցիչներ, որակի ենթակառուցվածքի հաստատություններ, արտադրողներ, գործարար ասոցիացիաներ, լաբորատորիաներ, վկայագրման մարմիններ և բուհերի ու հետազոտական կազմակերպությունների ներկայացուցիչներ։
ՍՉԱՄ-ի լաբորատորիաները ներառում են չորս հիմնական ուղղություն՝

• Էլեկտրականություն, ժամանակ ու հաճախականություն
• Ուժի մոմենտ ու ճնշում
• Անկյունագծային (երկարություն)
• Քիմիական 

Այս լաբորատորիաները հագեցած են ժամանակակից չափագիտական սարքավորումներով, որոնք կհզորացնեն ՍՉԱՄ-ի կարողությունները՝ ապահովելով բարձր ճշգրտությամբ ծառայություններ պետական և մասնավոր ոլորտների համար։ Նոր հնարավորությունները մեծապես կնպաստեն չափումների հետագծելիության ապահովմանը՝ աջակցելով հայկական արտադրողներին համապատասխանել միջազգային ստանդարտներին և խթանելով նորարարությունը և զարգացումը երկրում։ Լաբորատորիաները նաև կսպասարկեն փորձարկման լաբորատորիաներին և վկայագրման հաստատություններին՝ ապահովելով դրանց ծառայությունների հուսալիությունն ու ճշգրտությունը։
 

ՀՀ էկոնոմիկայի նախարար պարոն Գևորգ Պապոյանն ընդգծեց, որ այս լաբորատորիաները կարևոր քայլ են Հայաստանի որակի ենթակառուցվածքը զարգացնելու ուղղությամբ։ Նա նշեց, որ դրանք կնպաստեն արդյունաբերական ցուցանիշների բարելավմանը և հայկական արտադրանքների մրցունակության աճին միջազգային շուկայում: Գոհունակությամբ նշում եմ, որ Հայաստանի Հանրապետության չափագիտական կարողությունների հզորացումը նոր հնարավորություններ է ստեղծում մեր երկրի համար՝ արտահանման դիվերսիֆիկացիայի շրջանակներում որակի նոր ստանդարտների առաջմղման, ինչպես նաև ապրանքների և ծառայությունների որակի բարձրացման ուղղությամբ»:

Հայաստանում ԵՄ պատվիրակության ղեկավար, դեսպան Վասիլիս Մարագոսը նշեց. «Լաբորատորիաների բացումն այսօր նշանակալի ձեռքբերում է նորարարության ոլորտի համար, և մեծ առաջընթաց՝ Ստանդարտացման և չափագիտության ազգային մարմնի չափագիտության միջազգայնորեն ճանաչված ծառայություններ մատուցելու կարողությունների ընդլայնման ուղղությամբ։ Չափագիտությունը կարևոր դեր ունի ապրանքների և ծառայությունների որակի և հուսալիության ապահովման գործում, ինչը հիմնարար սկզբունք է արդյունաբերական և տեխնոլոգիական զարգացման, առևտրի դիվերսիֆիկացման և քաղաքացիների բարեկեցության համար: Այս օգնությունը նպաստում է Հայաստանի համար ԵՄ Տնտեսական և ներդրումային պլանի (EIP) իրականացմանը, որը երկրի տնտեսական աճին, կայուն զարգացմանն ու բարեկեցությանն ուղղված համապարփակ նախաձեռնություն է։

ՄԱԱԶԿ-ի գլխամասային գրասենյակի ներկայացուցիչ պարոն Բեռնար Բաուն հավելեց․ «Հավատում ես տեսնելով, սա հատկապես ճիշտ է, երբ խոսքը վերաբերում է այսպիսի ժամանակակից լաբորատորիաների բացմանը։ Մենք հիմա ականատեսն ենք այն տեխնոլոգիաների, որոնք սահմանելու են Հայաստանի չափագիտության ծառայությունների ապագան»:

Այս նշանակալի հաջողությունը ոգեշնչում է ապագա ծրագրերի իրականացմանը, որն հնարավոր դարձավ ԵՄ-ի, ՄԱԱԶԿ-ի և մեր ազգային գործընկերների՝ ՀՀ էկոնոմիկայի նախարարության և Ստանդարտների և չափագիտության ազգային մարմնի երկարատև և բացառիկ համագործակցության շնորհիվ։ Ես վստահ եմ այս լաբորատորիաների հաջողության մեջ և այն երկարատև ու կայուն ազդեցության վրա, որը այս նախագիծը կունենա երկրի զարգացման համար։

Պարոն Ժիրայր Էդիլյանը, ՄԱԱԶԿ-ի ներկայացուցիչը Հայաստանում, խոսեց որակի և չափագիտության դերի մասին՝ ընդգծելով միջազգային գործընկերությունների կարևորությունը։ Լաբորատորիայի բացման արարողությունից հետո կազմակերպվեց շրջայց, որի ընթացքում այցելուները ծանոթացան լաբորատորիաների տրամադրած ծառայություններին և տեխնոլոգիաներին։

Այնուհետ տեղի ունեցավ սեմինար «Չափագիտության ներդրումը համապատասխանության, արդյունավետության և մրցունակության ապահովման գործում» թեմայով ավելի քան 50 պետական և մասնավոր շահագրգիռ կողմերի համար։ Սեմինարում ընդգծվեց, թե ինչպես կարող են որակը և չափագիտությունը վերափոխել համապատասխանությունը՝ աջակցելով արդյունաբերական նորարարությանը և միջազգային շուկայում հայկական արտադրանքների մրցունակության բարձրացմանը։

«Աջակցություն որակի ենթակառուցվածքին Հայաստանում» ծրագիրն իրականացնում է ՄԱԱԶԿ-ը՝ Եվրոպական միության ֆինանսավորմամբ։ Ծրագրի հիմնական նպատակն է զարգացնել Ստանդարտացման և չափագիտության ազգային մարմնի (ՍՉԱՄ) կարողությունները՝ շահառուներին միջազգայնորեն ընդունելի չափագիտական ծառայություններ մատուցելու համար։ Հայաստանի չափագիտության համակարգի իրավական, կառուցվածքային և տեխնիկական կարգավորումների բարելավման միջոցով ծրագիրը նպաստում է համակարգի արդիականացմանը՝ խթանելով տնտեսական դիվերսիֆիկացիան և առևտրի մրցունակության բարձրացումը, ինչը համահունչ է ԵՄ-ի հետ ստորագրված «Համապարփակ և ընդլայնված գործընկերության համաձայնագրով» (CEPA) Հայաստանի ստանձնած հանձնառություններին։