Հայաստանի դատավորներն ու իրավաբանները կվերապատրաստվեն միջազգային աշխատանքային իրավունքի թեմայով՝ ընդլայնելով ներքին իրավական համակարգերում վերջիններիս կիրառելու հնարավորությունները

Սեպտեմբերի 15-ին ՄԱԿ-ի հայաստանյան գրասենյակում կայացավ ՀՀ Արդարադատության ակադեմիայի և ԱՄԿ-ի կողմից դատավորների և իրավաբանների համար համատեղ մշակված «Միջազգային աշխատանքային իրավունք» և «Ազգային աշխատանքի իրավունք» ուսումնական ծրագրերի մեկնարկին նվիրված միջոցառումը, որը կազմակերպել էր Միավորված ազգերի կազմակերպության Աշխատանքի միջազգային կազմակերպությունը (ԱՄԿ) և «Միասին նպաստենք Հայաստանում աշխատանքային իրավունքների իրացմանը» ծրագիրը։

«Դասընթացներն այն մասին են, թե ինչպես կարելի է գործնականում կիրառել մի շարք կանոններ՝ ի շահ և՛ գործատուների, և՛ աշխատողների: Իրավունքներ ունենալն անհրաժեշտ է իրավական համակարգի միջոցով դրանցով զբաղվելու և այդ վեճերը լուծելու այն գործիքներով, որոնք դուք կունենաք ձեր տրամադրության տակ», - իր խոսքում նշեց Հայաստանում ՄԱԿ-ի մշտական համակարգողի պաշտոնակատար Նաննա Սկաուն։

«ԱՄԿ-ն կարծում է, որ այս անվճար դասընթացները, որոնք հասանելի են լինելու առցանց և ինքնուսուցման ձևաչափերով, թույլ կտան դատավորներին և իրավաբաններին թարմացնել և զարգացնել իրենց աշխատանքային իրավունքի գիտելիքները, խթանելով միջազգային ձևաչափերի և ԱՄԿ կոնվենցիաների իրականացումը Հայաստանում։ Հուսով ենք, որ ծրագրի շրջանակում իրականացվող քայլերը, որոնք ուղղված են Հայաստանի գործող դատական համակարգի ամրապնդմանը, կնպաստեն ավելի արդյունավետ կառավարմանը, և աշխատանքային օրենսդրության և ընթացակարգերի իրականացմանը, որոնք համընթաց են միջազգային աշխատանքային ստանդարտների հետ»,- նշեց Աշխատանքի միջազգային կազմակերպության (ԱՄԿ) Արժանապատիվ աշխատանքի տեխնիկական աջակցության խմբի և Արևելյան Եվրոպայի ու Կենտրոնական Ասիայի երկրների համակարգող Միխայիլ Պուշկինը։

ԱՄՆ աշխատանքի դեպարտամենտի (USDOL) միջազգային հարաբերությունների գծով պատասխանատու Ստեֆան Մարլերը իր հերթին ընդգծեց, որ ԱՄՆ աշխատանքի դեպարտամենտը միշտ կարևորել է ամուր և լավ տեղեկացված իրավական համակարգերի գոյությունը:

«Այս դասընթացը կծառայի որպես գիտելիքի փարոս՝ լուսավորելով աշխատանքային իրավունքի բարդությունները ավելի լավ հասկանալու ճանապարհը: Այն մեր դատավորներին և իրավաբաններին կտրամադրի գործիքներ, որոնք անհրաժեշտ են այնպիսի որոշումներ կայացնելու համար, որոնք և՛ իրավաբանորեն հիմնավոր են, և՛ իրապես արդար»։

«Միասին նպաստենք Հայաստանում աշխատանքային իրավունքների իրացմանը» ԱՄԿ ծրագրի համակարգող Նվեր Սարգսյանը նշել է, որ դասընթացը կենտրոնացած է ներպետական իրավական համակարգերում միջազգային աշխատանքային իրավունքի կիրառման վրա՝ կենտրոնանալով աշխատանքային վեճերի լուծման վրա: Դասընթացի նպատակն է դատական գործընթացներում ավելացնել Աշխատանքի միջազգային կազմակերպության (ԱՄԿ) կոնվենցիաներին և Աշխատանքի միջազգային ստանդարտներին հղումները:

 

ՀՀ արդարադատության ակադեմիայի ռեկտոր Սերգեյ Առաքելյանը ներկայացրել է դասընթացի մանրամասները։ Ուսումնական նյութերը ինտեգրվելու են Ակադեմիայի ուսումնական ծրագրին՝ առկա և առցանց ինքնուսուցման ձևաչափերով, որպեսզի դատավորներն ու իրավաբանները կարողանան անվճար օգտվել և օգտագործել դասընթացի նյութերը:

Հավելենք, որ միջոցառման շրջանակում կայացել է լուսանկարիչ  Վանյա Բերյոզկինի լուսանկարների ցուցահանդեսը՝ նվիրված սեպտեմբերի 18-ին նշվող Հավասար վարձատրության միջազգային օրվան:

«Միասին նպաստենք Հայաստանում աշխատանքային իրավունքների իրացմանը» ծրագիրն իրականացվում է ԱՄԿ կողմից և ֆինանսավորվում է ԱՄՆ աշխատանքի դեպարտամենտի կողմից (USDOL)։ Ծրագրի հիմնական նպատակն է հզորացնել աշխատանքային օրենսդրության համապատասխանությունը միջազգայնորեն ընդունված չափորոշիչների հետ, ինչպես նաև բարձրացնել դատական ​​և արտադատական ​​պաշտպանության միջոցների մատչելիությունը Հայաստանում: