14-24 տարեկանների 8 ստարտափ թիմ նախնական ֆինանսավորում է ստացել «ԻմաՋեն» երիտասարդական նախաձեռնության «Սերունդ առանց սահմանների» մրցույթի շրջանակում

«ԻմաՋեն» երիտասարդական նախաձեռնության «Սերունդ առանց սահմանների» մրցույթի շրջանակում Դիլիջանում անցկացված բութքեմփի ավարտին 14-24 տարեկան երիտասարդների ութ ստարտափ թիմ անցել է նախագծերի իրականացման փուլ՝ յուրաքանչյուրը որպես նախաֆինանսավորում ստանալով 1000 ԱՄՆ դոլարին համարժեք ՀՀ դրամ:

 

«Սերունդ առանց սահմանների» մրցույթի մեկնարկը տրվել է այս տարվա մարտի սկզբին՝ ՄԱԿ-ի հայաստանյան գրասենյակի, ՅՈՒՆԻՍԵՖ-ի, ՄԱԿ-ի Զարգացման հիմնադրամի, ՄԱԿ-ի Բնակչության հիմնադրամի, ինչպես նաև «Այբ» կրթական հիմնադրամի կողմից։ Մրցույթի հայտերի ընդունման փուլում ստացվել է 109 հայտադիմում Հայաստանի վեց մարզերը և Երևանը ներկայացնող 14-24 տարեկան երիտասարդներից։ Հայտերում ներկայացված են եղել տարաբնույթ գաղափարներ՝ ուղղված կրթական որակի բարելավմանը և քաղաքացիական ակտիվիզմի խթանմանը, աշխատատեղերի ավելացմանը, կլիմայի փոփոխության կանխմանը, մեդիագրագիտությանը և հոգեկան առողջության վերաբերյալ իրազեկման մակարդակի բարձրացմանը:

«Սերունդ առանց սահմանների» մրցույթի գործընկերներն են Կրթության, գիտության, մշակույթի և սպորտի նախարարությունը, «Սիներջի» ընկերության հայաստանյան գրասենյակը ու «Բոդի շոփ» բրենդի հայաստանյան մասնաճյուղը։ Ներկայացված 109 հայտադիմումներից ընդհանուր ընտրական հանձնաժողովի կողմից առանձնացվել են 12-ը, որոնք մրցել են մայիսի 28-29-ին Դիլիջանում անցկացված բութքեմփի շրջանակում։ Արդյունքում գաղափարների ինկուբացիոն փուլ են անցել հետևյալ ութ թիմերը․

1. «Landslide Rulers» թիմը (Երևան), որը ցանկանում է կառուցել հատուկ վանդակներ՝ վերօգտագործելով թափոնները՝ դրանց երկրորդ կյանք հաղորդելով և միաժամանակ պայքարելով սողանքների դեմ:

2. «ԿԼԻՄԱՊՈԼԻՍ» թիմը (Վեդի) նախատեսում է սեղանի խաղ ստեղծել, որը կունենա նաև իր առցանց տարբերակը՝ ներկայացնելով երիտասարդներին, թե ինչպես կարելի է նվազեցնել կլիմայի փոփոխության հետևանքները:

3. «Creative Corner» թիմի (Գյումրի) գաղափարը ոչ ֆորմալ կրթական հաստատության ստեղծումն է, որը սպասարկման ոլորտում առաջարկում է վերապատրաստում և պրակտիկա՝ օգնելով երիտասարդներին մուտք գործել աշխատաշուկա:

4. «Tea & More» թիմը (Կողբ) նախատեսում է ստեղծել չրերի և բուսական թեյերի արտադրություն:

5. Girlopolis» թիմի (Երևան) գաղափարը STEM-ով հետաքրքրված աղջիկների համար մի շարք հեքաթներ անցկացնելն է՝ խրախուսելով աղջիկներին հիմնել իրենց ստարտափները, զարգացնել իրենց տեխնոլոգիական գաղափարները:

6. «MeDialog» թիմը (Երևան) նախատեսում է խրախուսել մեդիագրագիտությունը դեռահասների և երիտասարդների շրջանում՝ կանխելով առցանց բռնության ենթարկվելու և խարդախությունների մեջ ներքաշվելու վտանգները՝ դարձնելով երիտասարդներին ավելի ինքնավստահ և ավելի պաշտպանված:

7. «Vayeli Cafe and Bakery» թիմի գաղափարը Կապանում սրճարան հիմնելն է: Այդպիսով ոչ միայն աշխատատեղեր կստեղծվեն, այլև այն կծառայի որպես հավաքատեղի երիտասարդների համար:

8. «էկո Կողբ» թիմի գաղափարն է Տավուշում ստեղծել էկո տոպրակների կարի արտադրամաս, որը կկանխի պոլիէթիլենային տոպրակների օգտագործումը, աշխատատեղեր կստեղծի կանանց և հաշմանդամություն ունեցող անձանց համար։ GenU-ի աջակից «Բոդի շոփ»-ը խոստացել է աջակցել Էկո Կողբին և խթանել պայուսակների վաճառքը Հայաստանի «Բոդի շոփ»-ի խանութների ցանցում:

Այս փուլում թիմերը կուղղեն տրամադրված նախաֆինանսավորումը իրենց գաղափարների իրագործմանը՝ ոլորտային փորձագետների աջակցմամբ:

«Սերունդ առանց սահմանների» մրցույթի նպատակն է հնարավորություն ընձեռել երիտասարդներին՝ ծավալելու հանրօգուտ գործունեություն, լսելի դարձնելու իրենց ձայնը, ինչպես նաև բացահայտելու և իրագործելու իրենց ներուժը ձեռնարկատիրության և ստեղծարարության ոլորտներում: Երիտասարդ տարիները լավագույն ժամանակն են նախաձեռնորեն լուծելու սեփական համայնքների սոցիալական խնդիրները: Ինչպես ցույց է տվել դիմումների ընդունման փուլը, հայ երիտասարդները գաղափարների պակաս չունեն և պատրաստակամ են նպաստելու իրենց երկրի զարգացմանը և ապագայի կերտմանը»,- միաձայն փաստում են կազմակերպիչները:

2022 թ.-ի հուլիսին ներկայացված լուծումներից ամենախոստումնալից երկուսը կմասնակցեն մրցույթի միջազգային փուլին, որի հաղթող նախագծերը լրացուցիչ ֆինանսավորում կստանան, իսկ մրցույթի գործընկերների կողմից մշակված ինկուբացիոն միջազգային հատուկ ծրագիրը կնպաստի այդ նախագծերի մասշտաբների ընդլայնմանը։