ՄԱԿ-ի Գլխավոր քարտուղար Անտոնիո Գուտերեշի ուղերձը Երկիր մոլորակի միջազգային օրվա առթիվ

Այսօր Երկիր մոլորակի միջազգային օրն է։

Սա հնարավորություն է մտածելու, թե ինչպես է մարդկությունը վերաբերվում մեր մոլորակին։

Ճշմարտությունն այն է, որ մենք մեր փխրուն տան վատ պահապաններն ենք եղել։

Այսօր Երկիր մոլորակը կանգնած է եռակի համամոլորակային ճգնաժամի առաջ։

Կլիմայի փոփոխություն:

Բնության և կենսաբազմազանության կորուստ:

Աղտոտվածություն և թափոններ:

Այս եռակի ճգնաժամը սպառնում է ամբողջ աշխարհում միլիոնավոր մարդկանց բարեկեցությանն ու գոյատևմանը։

Երջանիկ, առողջ կյանքի բաղադրիչները՝ մաքուր ջուրը, մաքուր օդը, կայուն և կանխատեսելի կլիման, նվազել են՝  վտանգելով Կայուն զարգացման նպատակների իրագործումը:

Բայց դեռ հույս կա։

Հիսուն տարի առաջ գումարվեց Ստոկհոլմի կոնֆերանսը:

Դա համաշխարհային բնապահպանական շարժման սկիզբն էր։

Այդ ժամանակից ի վեր հասկացել ենք, թե ինչի կարող ենք հասնել, երբ միավորում ենք ջանքերը։

Մենք կրճատել ենք օզոնային շերտի անցքը։

Ուժեղացրել ենք վայրի բնության և էկոհամակարգերի պաշտպանությունը։

Վերացրել ենք էթիլացված վառելիքի կիրառումը՝ կանխելով միլիոնավոր վաղաժամ մահեր:

Եվ անցած ամիս շրջադարձային գլոբալ քայլեր ենք ձեռնարկել՝ կանխելու և դադարեցնելու պլաստիկ աղտոտումը:

Ապացուցել ենք, որ միասին կարող ենք հաղթահարել մեծ մարտահրավերները:

Եվ առողջ միջավայր ունենալու իրավունքը գնալով տարածվում է:

Բայց պետք է շատ ավելին անենք: Եվ շատ ավելի արագ:

Հատկապես կլիմայական աղետը կանխելու համար։

Պետք է սահմանափակենք մոլորակի վրա ջերմաստիճանի բարձրացումը  մինչև 1,5 աստիճան։

Մենք հեռու ենք նախանշված նպատակին հասնելուց։

Այս նպատակին հասնելու համար կառավարությունները մինչև 2030 թվականը պետք է կրճատեն արտանետումները 45 տոկոսով  և հասնեն ածխածնի չեզոքության մինչև 2050 թվականը:

Խոշոր արտանետողները պետք է  այս տարվանից կտրուկ կրճատեն վնասակար նյութերի արտանետումները:

Նշանակում է՝ պետք է արագ դադարեցնել հանածո վառելիքից կախվածությունը:

Եվ արագացնել անցումը մաքուր վերականգնվող էներգիայի աղբյուրներին:

Միևնույն ժամանակ, պետք է արագ ներդրումներ կատարենք՝ միտված հարմարվողականությանը և դիմակայունությանը, հատկապես ամենաաղքատ և խոցելի խավերի համար, ովքեր ամենաքիչն են նպաստել ճգնաժամին:

Հունիսին ամբողջ աշխարհի ներկայացուցիչները կրկին կհանդիպեն Շվեդիայում կայանալիք «Ստոկհոլմ+50» համաժողովին։

Եկեք երաշխավորենք, որ մեր ղեկավարները վճռականություն ցուցաբերեն և ձեռնարկեն անհրաժեշտ քայլեր՝ մեր մոլորակի վրա ստեղծված եռակի արտակարգ իրավիճակը կարգավորելու համար։

Քանի որ ունենք միայն մեկ Մայր Երկիր մոլորակ:

Պետք է ամեն ինչ անենք նրան պաշտպանելու համար: