ՄԱԿ-ի գլխավոր քարտուղարի հայտարարությունը՝ Հայաստանի, Ադրբեջանի և Ռուսաստանի ղեկավարների միջև եռակողմ հանդիպման վերաբերյալ

ՄԱԿ-ի Գլխավոր քարտուղարը ողջունում է նոյեմբերի 26-ին Հայաստանի վարչապետի, Ադրբեջանի նախագահի և Ռուսաստանի Դաշնության նախագահի միջև կայացած եռակողմ հանդիպումը և ի գիտություն է ընդունում նրանց համատեղ հայտարարությունը: Նա բարձր է գնահատում Ռուսաստանի Դաշնության դերը՝ շարունակական շփումներին և երկխոսությանն աջակցելու հարցում։

Գլխավոր քարտուղարը ոգևորված է Հայաստանի և Ադրբեջանի միջև բարձր մակարդակի ուղղակի շփման վերականգնմամբ և 2020 թ. նոյեմբերի 9-ի և 2021 թ. հունվարի 11-ի եռակողմ հայտարարություններն ամբողջությամբ կատարելու ու տարածաշրջանում կայունության բարձրացմանն ուղղված հստակ քայլեր ձեռնարկելու նրանց հանձնառությամբ: Նա վերահաստատում է ՄԱԿ-ի սկզբունքային դիրքորոշումն այն մասին, որ տևական խաղաղություն կարող է ձեռք բերվել միայն երկխոսության միջոցով, և կողմերին կոչ է անում այդ նպատակով լուծել չլուծված հարցերը բոլոր հասանելի ձևաչափերով, այդ թվում՝ ԵԱՀԿ Մինսկի խմբի համանախագահների հովանու ներքո: Միավորված ազգերի կազմակերպությունը պատրաստ է աջակցելու բոլոր այդպիսի ջանքերին, այդ թվում՝ տեղում մարդասիրական, վերականգնողական ու խաղաղապահ աջակցություն տրամադրելու միջոցով: