ADAMS-ի վերաբերյալ ամփոփիչ խորհրդակցություններ

ADAMS-ը առցանց տեղեկատվական կառավարման համապարփակ համակարգ է, որը պատկանում և շահագործվում է ՀՀ կառավարության կողմից: Այս կենտրոնացված համակարգը ծառայում է որպես ընդհանուր զարգացման աջակցության և օգնության ծրագրերի վերաբերյալ կարևոր տվյալների պահոց։ Համակարգը մշակվել է Synergy International Systems-ի կողմից։

«ADAMS-ը նորարարական նախաձեռնություն է Հայաստանում, որն ուղղված է երկրում թափանցիկության, հաշվետվողականության և զարգացման աջակցության համակարգման բարելավմանը` համահունչ կառավարության առաջնահերթություններին և ազգային զարգացման ռազմավարություններին: Սա կարևոր է զարգացման աջակցության կազմակերպված և արդյունավետ մոտեցման համար, հատկապես հաշվի առնելով Կայուն զարգացման նպատակներին հասնելու երկրի պարտավորությունները», - բացման խոսքում նշեց Հայաստանում ՄԱԿ-ի մշտական համակարգող Ֆղանսուազ Ժակոբը։ 

«Ես կցանկանայի ընդգծել, որ ADAMS-ը զգալի առաջընթաց է Հայաստանի համար՝ զարգացման ծրագրերը թափանցիկ և արդյունավետ կերպով կառավարելու և զեկուցելու առումով: Մենք երախտապարտ ենք մեր գործընկերներին և շահագրգիռ կողմերին իրենց շարունակական աջակցության համար և ակնկալում ենք երկարատև համագործակցություն՝ այս կարևոր համակարգի լիարժեք իրականացման գործում», - ասաց Հայաստանում ՄԱԶԾ մշտական ​​ներկայացուցիչ Նատիա Նացվլիշվիլին:

Փոխվարչապետ պարոն Գրիգորյանի խորհրդական Անի Բաբայանը կարևորեց հարթակի գործնական ասպեկտները․ «ADAMS-ը կուժեղացնի զարգացման աջակցության և ֆինանսների համակարգումը կենտրոնացված տեղեկատվական կառավարման միջոցով, ներառելով տեղեկատվություն ծրագրի գործողությունների վերաբերյալ: Հայաստանի կառավարությունը հանձնառու է ապահովել հարթակի լիարժեք գործունեությունը»։

ADAMS-ի վերջնական տարբերակը ներկայացրեց Անի Բաբայանը և Synergy International Systems-ի ծրագրի ղեկավար Հովհաննես Աղաջանյանը, որին հաջորդեցին միջոցառման մասնակիցների հարցերն ու պատասխանները:

Միջոցառմանը ներկա էին կառավարության, տեղական և միջազգային կազմակերպությունների ներկայացուցիչներ, ՄԱԿ-ի համապատասխան գործակալությունների աշխատակիցներ և այլ շահագրգիռ կողմեր: