Բելգիայի թագուհի Նորին Մեծություն Մաթիլդայի այցը Հայաստանում ՄԱԿ-ի կողմից աջակցվող ծրագրեր
ՄԱԿ-ի հայաստանյան գրասենյակը պատիվ ուներ հյուրընկալելու Բելգիայի թագուհի Մաթիլդային՝ ՄԱԿ-ի Կայուն զարգացման նպատակների պաշտպանին։
ՄԱԿ-ի գործակալությունների հետ թեմատիկ հանդիպումից հետո Նորին Մեծությունն այցելեց ՄԱԿ-ի կողմից աջակցվող ծրագրեր՝ ծանոթանալու Հայաստանի՝ Կայուն զարգացման նպատակներին հասնելու հանձնառության օրինակներին։
Նորին Մեծությունն այցելեց «Ավան» հոգեկան առողջության կենտրոն, որտեղ Նրան ջերմորեն դիմավորեցին առողջապահության նախարար Անահիտ Ավանեսյանը և Հայաստանում ԱՀԿ ներկայացուցիչ դոկտոր Սիդարթա Դատտան։ Այցելության ընթացքում ընդգծվեցին Հայաստանի հոգեկան առողջության ոլորտում բարեփոխումները, որոնք իրականցվում են Առողջապահության նախարարության առաջնորդությամբ՝ Առողջապահության համաշխարհային կազմակերպության և գործընկերների աջակցությամբ։
Նորին Մեծությունն այցելեց նաև «Սևան» ազգային պարկի «Նորաշեն» արգելավայր՝ ծանոթանալու Հայաստանի կենսաբազմազանության պահպանության և կայուն զարգացման ոլորտում իրականացված աշխատանքների արդյունքներին: Թագուհուն դիմավորեցին ՀՀ շրջակա միջավայրի նախարարի տեղակալ Արամ Մեյմարյանը, Հայաստանում ՄԱԶԾ մշտական ներկայացուցիչ Նաթիա Նացվլիշվիլին, «Սևան» ազգային պարկի, ինչպես նաև մարզային և համայնքային ղեկավարությունը: Այցի ընթացքում Թագուհուն ներկայացվեց «Սևան» ազգային պարկի նոր կառավարման պլանը, որը մշակվել է ՄԱԶԾ-ի աջակցությամբ, ինչը վերջին 14 տարիների ընթացքում առաջին մեծ թարմացումն է:
Շարունակելով այցելությունները՝ Բելգիայի թագուհի, Նորին Մեծություն Մաթիլդան ժամանեց Ծաղկունք համայնքի՝ ՅՈՒՆԻՍԵՖ-ի աջակցությամբ գործող այլընտրանքային նախակրթարան։ Այն հիմնվել է ԿԳՄՍ նախարարության և Սևան համայնքի հետ համագործակցությամբ՝ Եվրոպական Միության ֆինանսական աջակցությամբ։ Այստեղ Նորին Մեծությունը ծանոթացավ վաղ մանկական ուսումնառության առանձնահատկություններին:
Բելգիայի թագուհի Մաթիլդայի հաջորդ այցը ՄԱԿ-ի փախստականների հարցերով գերագույն հանձնակատարի (ՓԳՀ) գործընկեր «Առաքելություն Հայաստան» սոցիալական ծառայությունների կենտրոնում էր։ Աշխատանքի և սոցիալական հարցերի նախարարության և ՄԱԿ ՓԳՀ գրասենյակի կողմից աջակցվող «Առաքելություն Հայաստան» կենտրոնը բազմաթիվ վայրերից է, որտեղ փախստականներն ու խոցելի իրավիճակում գտնվող մարդիկ միասին ուժ են գտնում՝ բաց դռների և օգնող ձեռքերի շնորհիվ։
Բելգիայի թագուհի Նորին Մեծություն Մաթիլդայի այցելությունը Հայաստան հատկապես ընդգծեց, որ Նորին Մեծության ուղղորդմամբ Բելգիան կանգնած է Հայաստանի կողքին Հայաստանի՝ Կայուն զարգացման նպատակներին հասնելու հանձնառության այս կարևոր ճանապարհին։
Այս նախաձեռնությանը մասնակցող ՄԱԿ-ի գործակալությունները
Նպատակները, որոնց մենք աջակցում ենք այս նախաձեռնությամբ
