Գիտելիքի ձեռքբերում՝ ներգրավվածության միջոցով. Հայկական պատվիրակությունը մասնակցել է գյուղական երիտասարդական երկրորդ տարածաշրջանային ֆորումին

Եվրոպայի և Կենտրոնական Ասիայի երկրներում գյուղաբնակ բնակչության ծերացումը և գյուղատնտեսության ոլորտում երիտասարդների ներգրավվածության նվազումը շարունակում են մարտահրավերներ մնալ: Այս համատեքստում, ՄԱԿ-ի Պարենի և գյուղատնտեսության կազմակերպության (ՊԳԿ) նախաձեռնությամբ հունիսի 11-13-ը Բուդապեշտում տեղի ունեցած գյուղական երիտասարդության երկրորդ տարածաշրջանային ֆորումը ծառայեց որպես երկխոսության և փորձի փոխանակման կարևոր հարթակ՝ համախմբելով 22 երկրների երիտասարդների, քաղաքականություն մշակողների և զարգացման գործընկերների:

Եռօրյա միջոցառման ընթացքում մասնակիցները քննարկումներ ունեցան մի շարք առանցքային թեմաների շուրջ, ինչպիսիք են գյուղատնտեսության սերնդափոխության խթանումը, երիտասարդությանը նպաստող գյուղատնտեսական քաղաքականությունները, ինչպես նաև երիտասարդների մասնակցության ընդլայնումը կայուն և կանաչ գյուղատնտեսական պրակտիկաներին։ Շատերի համար դա պարզապես քաղաքականության քննարկում չէր, այլ լսելի լինելու իրական հնարավորություն:

Հայաստանը ֆորումի ընթացքում ներկայացնում էին Հայաստանի Հանրապետության Էկոնոմիկայի նախարարության ներկայացուցիչ Լիլիթ Հակոբյանը և օրգանական գյուղատնտեսությամբ զբաղվող ֆերմեր Էմմա Խաչատրյանը։

Երբ Եվրոպայի և Կենտրոնական Ասիայի տարբեր երկրների ներկայացուցիչները կիսվում էին իրենց ազգային փորձով, Լիլիթ Հակոբյանի ուշադրությունը գրավեց Հունգարիայի փորձը՝ ուղղված գյուղատնտեսության նկատմամբ երեխաների հետաքրքրվածության խթանմանը։  Նա հատկապես տպավորված էր դպրոցական ծրագրով, որի շրջանակներում երեխաներին տրամադրում են սերմեր և ծնողների աջակցությամբ խրախուսվում է աճեցնել իրենց սեփական բույսերը՝ այդ կերպ վաղ տարիքից ձևավորելով գյուղատնտեսության և պարենային համակարգերի վերաբերյալ պատկերացում։ Լիլիթ Հակոբյանը նշեց, որ նմանատիպ նախաձեռնությունների ներդրումը Հայաստանի կրթական համակարգում կարող է նպաստել երիտասարդների շրջանում գյուղատնտեսության վերաբերյալ գերիշխող ընկալումների փոփոխությանը՝ այն դիտարկելով ոչ թե որպես ֆիզիկական աշխատանք պահանջող և նվազ կրթական հենք ունեցող մասնագիտություն, այլ որպես նորարար, արժանապատիվ և հեռանկարային գործունեության ոլորտ երիտասարդների համար:

«Բարի Ֆարմ» ընկերության հիմնադիր, օրգանական գյուղատնտեսությամբ զբաղվող երիտասարդ ֆերմեր Էմմա Խաչատրյանը ներկայացրեց իր փորձն ու անցած ճանապարհը դեպի կայուն գյուղատնտեսություն: Իր ելույթի ընթացքում նա ընդգծեց այդ ճանապարհին հանդիպած հիմնական մարտահրավերներն ու նվաճումները, այդ թվում՝ սահմանափակ ռեսուրսները: Նրա խոսքով՝ ֆորումի ընթացքում նրան ամենաշատը դուր եկավ այն հանգամանքը, թե որքան նման էին երիտասարդ գյուղատնտեսների դժվարությունները տարբեր երկրներում, անկախ նրանց մշակութային կամ սոցիալ-տնտեսական միջավայրերից։

«Մենք բոլորս կանգնած ենք նույն դժվարությունների առջև՝ հողի, ֆինանսների և շուկաների հասանելիություն, ինչպես նաև որոշումների կայացման գործընթացում երիտասարդների ներգրավվածության պակաս», - նշեց Էմման։ Նրան ոգևորեց այն թե ինչպես է ՊԳԿ-ն հավատարիմ մնում առաջադեմ, երիտասարդամետ նախաձեռնություններ իրականացնելուն, որոնք ուղղված են նորարարության և կայունության խթանմանը՝ ճիշտ այնպիսի մոտեցումներ, որոնք հատկապես գրավիչ են երիտասարդների համար։

«Ես կցանկանայի, որ Հայաստանում ավելանան պետական աջակցության ծրագրերը, որոնք ուղղված են երիտասարդների հզորացմանը գյուղատնտեսության ոլորտում: Մենք պետք է գյուղատնտեսությունն երիտասարդներին ներկայացնենք ոչ թե որպես հնացած, այլ որպես ժամանակակից, եկամտաբեր և ազդեցիկ ոլորտ», – հավելեց նա։

Միջոցառումը նաև նշանավորեց ՊԳԿ-ի հիմնադրման 80-ամյակը՝ ընդգծելով երիտասարդների կարևոր դերը գյուղատնտեսության լավ ապագայի ձևավորման գործում։

 Այս տեսակի նախաձեռնությունների միջոցով ՊԳԿ-ն առաջնահերթություն է տալիս երիտասարդներին, որպես կայուն պարենային համակարգերի և դիմացկուն գյուղական տնտեսությունների կառուցման հիմնական դերակատարների:

Հայաստանի պատվիրակների՝ Էմմայի և Լիլիթի համար ֆորումը հզոր հիշեցում էր այն ​​մասին, որ երիտասարդների ներգրավվածությունը գյուղատնտեսության ոլորտում գերազանցում է քաղաքական քննարկումների շրջանակը: Այն հանդիսանում է գյուղական համայնքների կենսունակության ապահովման, գյուղատնտեսական ժառանգության արժևորման և ոլորտի ապագային երիտասարդների լիարժեք մասնակցության կարևորագույն բաղադրիչ:

Lրատվական հոդվածն ամբողջությամբ՝

Երիտասարդության ներուժը` գյուղական տարածքների վերածննդի համար 

Միջոցառման էջ՝
Եվրոպայի և Կենտրոնական Ասիայի գյուղական երիտասարդության երկրորդ տարածաշրջանային ֆորում

Լուսանկարներ՝
https://www.flickr.com/photos/128106072@N05/albums/72177720326776630/