Կայուն զարգացում Հայաստանում. կամուրջ՝ Բրազիլիայում կայանալիք COP30-ի և Հայաստանում անցկացվելիք COP17-ի միջև

Կայացավ Հայաստանում կայուն զարգացման միջազգային համաժողովը, որը կազմակերպել էր Եվրոպական բիզնես ասոցիացիան։ Միջոցառումը ծառայեց որպես ռազմավարական հարթակ՝ միավորելու բոլոր շահագրգիռ կողմերին՝ այդ թվում կառավարությանը, միջազգային կազմակերպություններին, քաղաքացիական հասարակությանը, կրթական ոլորտին, մասնավոր հատվածի առաջնորդներին և երիտասարդության ներկայացուցիչներին։

Համաժողովի ընթացքում քննարկման առանցքում էին Կլիմայի փոփոխության վերաբերյալ 30-րդ համաժողովը (COP30), որը տեղի կունենա 2025 թվականի նոյեմբերին Բրազիլիայում, ինչպես նաև Հայաստանի դերը՝ որպես Կենսաբազմազանության մասին Կոնվենցիայի կողմերի 17-րդ համաժողովի (COP17) հյուրընկալող երկիր 2026 թվականի աշնանը։

Միջոցառումը հնարավորություն տվեց քննարկել տեղական և տարածաշրջանային մակարդակներում կլիմայի փոփոխության, կենսաբազմազանության պահպանման և բնական ռեսուրսների կայուն օգտագործման մարտահրավերները։

Իր ելույթում Հայաստանում ՄԱԿ-ի մշտական համակարգող Ֆրանսուազ Ժակոբը ընդգծեց, որ COP17-ը հյուրընկալելու նախապատրաստական փուլը հրաշալի առիթ է Հայաստանի համար ցույց տալու իր նվիրվածությունը Կայուն զարգացման 2030 օրակարգին։ 

«Մենք հավատում ենք, որ Հայաստանի համար COP17-ը հյուրընկալելը մեծ հնարավորություն է դառնալու կենսաբազմազանության ոլորտում առաջատար երկիր։ Կառավարության ջանքերով և բոլոր շահագրգիռ կողմերի համատեղ աջակցությամբ վստահ ենք, որ կարող ենք հասնել հաջողության», – ասաց նա՝ վերահաստատելով ՄԱԿ-ի պատրաստակամությունը՝ աջակցելու Հայաստանի նախաձեռնություններին։

Համաժողովի ընթացքում մասնակիցները դիտարկեցին ՄԱԿ-ի Կայուն զարգացման նպատակներին հասնելու ուղղությամբ Հայաստանի ձեռնարկած քայլերը և առկա մարտահրավերները։ Քննարկման թեմաներից էին նաև կլիմայական գործողությունները, մաքուր էներգիայի զարգացումը և կայուն համայնքների կառուցումը՝ COP30-ի փորձի վրա հիմնվելով և COP17-ին արդյունավետ նախապատրաստվելու նպատակով։