Այց Եվրոպական միության որակի ենթակառուցվածքի կառույցներ և միջազգային չափագիտական կազմակերպություններ

Այցը կազմակերպվել էր Եվրոպական միության ֆինանսավորմամբ իրականացվող «Աջակցություն որակի ենթակառուցվածքին Հայաստանում» ծրագրի շրջանակում և նպատակ ուներ խորացնելու մասնակիցների գիտելիքներն ԵՄ որակի ենթակառուցվածքի համակարգի և միջազգային չափագիտական կառույցների վերաբերյալ։

«Federale Overheidsdienst Economie, K.M.O., Middenstand en Energie» բելգիական պետական գործակալությունում հանդիիպումների ժամանակ անդրադարձ կատարվեց Եվրոպական հավատարմագրման կարևորությանը։ Հայկական պատվիրակությունն ուսումնասիրեց «WELMEC» կազմակերպության գործունեությունը՝ ծանոթանալով Եվրոպայում չափագիտության իրավական կարգավորումների համահունչեցմանը։ EURAMET-ի ներկայացուցիչների հետ հանդիպման ժամանակ քննարկվեցին ազգային չափագիտական ինստիտուտների համագործակցությանը և չափման միասնական ստանդարտների մշակմանը վերաբերող հարցեր։

Այցի ընթացքում պատվիրակությունը հանդիպում ունեցավ նաև Եվրոպական միությունում ՄԱԱԶԿ ներկայացուցիչների հետ։ Կողմերը քննարկեցին որակի ենթակառուցվածքի և առևտրի դիվերսիֆիկացման ոլորտներում հնարավոր համագործակցության շրջանակը։

Փարիզում հայկական պատվիրակությունն այցելեց Չափերի և կշիռների միջազգային բյուրո (BIPM), ինչպես նաև Ֆրանսիայի ազգային չափագիտական և փորձարկման լաբորատորիա, որտեղ դիտարկվեցին Հայաստանի և Ազգային չափագիտական և փորձարկման լաբորատորիայի միջև ապագա համագործակցության հնարավորությունները։

Իրավական չափագիտության միջազգային կազմակերպությունում (OIML) հանդիպմանն անդրադարձ կատարվեց անդամակցության տարբեր հնարավոր կարգավիճակներին, համապատասխան ընթացակարգերին և Հայաստանի համար այդ անդամակցության հնարավոր առավելություններին։

Ուսումնական այցն ավարտվեց ժամանակակից լաբորատորիայի շրջայցով, որի ընթացքում մասնակիցները ծանոթացան փորձարկման և տրամաչափման առաջատար տեխնոլոգիաներին և գործընթացներին։