ՄԱԿ-ի գլխավոր քարտուղարի ուղերձը Կանանց նկատմամբ բռնության վերացման միջազգային օրվա առթիվ

Յուրաքանչյուր 11 րոպեի ընթացքում մեկ կին կամ աղջիկ սպանվում է մտերիմ ընկերոջ կամ ընտանիքի անդամի կողմից։ Հայտնի է, որ այլ հանգամանքների պատճառով առաջացած սթրեսային իրավիճակները՝ սկսած ՔՈՎԻԴ-19 համավարակից մինչև տնտեսական ցնցումներ, անխուսափելիորեն հանգեցնում են ավելի մեծ չափերի ֆիզիկական և վերբալ բռնության։

Կանայք և աղջիկները նաև բախվում են համացանցում տարածված բռնության՝ կնատյացության հիմքով ատելության խոսքից մինչև սեռական ոտնձգություն, չարամտորեն նկարի տարածում և զոհի վստահությունը ձեռք բերելը։

Խտրականությունը, բռնությունն ու չարաշահումը, որին ենթարկվում է մարդկության կեսը, թանկ գին ունի: Այն սահմանափակում է կանանց և աղջիկների մասնակցությունը կյանքի բոլոր ոլորտներում, զրկում է նրանց հիմնարար իրավունքներից և ազատություններից և խոչընդոտում է հավասար տնտեսական վերականգնմանը և կայուն աճին, որ այդքան անհրաժեշտ է։

Եկել է փոփոխությունների ժամանակը, որոնք վերջ կդնեն կանանց և աղջիկների նկատմամբ բռնությանը:

Սա նշանակում է, որ կառավարությունները պետք է մշակեն, ֆինանսավորեն և իրականացնեն ազգային գործողությունների ծրագրեր՝ այս չարիքի դեմ պայքարելու համար:

Սա նշանակում է, որ որոշումների կայացման յուրաքանչյուր փուլում պետք է ներգրավել հանրային ակտիվ և քաղաքացիական հասարակության խմբերին։ 

Նշանակում է՝ ապահովել, որ օրենքները գործեն և հարգվեն, որպեսզի տուժածները պահանջեն արդարադատություն և պաշտպանեն իրենց իրավունքները։

Նշանակում է՝ աջակցել հանրային արշավներին, որոնք վիճարկում են հայրիշխանական նորմերը և մերժում կնատյացությունն ու բռնությունը:

Այս տարվա «ՄԻԱՍԻՆ վերջ դնենք կանանց և աղջիկների նկատմամբ բռնությանը» թեմային համահունչ՝ պետք է կանգնել ակտիվիստների կողքին ամբողջ աշխարհում, ովքեր կոչ են անում փոփոխությունների գնալ և աջակցել բռնության զոհերին։ Կոչ եմ անում կառավարություններին մինչև 2026 թվականը 50 տոկոսով ավելացնել կանանց իրավունքների պաշտպանությամբ զբաղվող կազմակերպությունների և շարժումների ֆինանսավորումը։

Եկեք ամուր դիրքորոշում որդեգրենք և հանդես գանք ի պաշտպանություն կանանց իրավունքների։

Եկեք հպարտորեն հայտարարենք՝  մենք բոլորս ֆեմինիստ ենք:

Եկեք մոռացության մատնենք կանանց և աղջիկների նկատմամբ բռնությունը՝ թողնելով դա պատմության գրքերում։