ՄԱԿ ՓԳՀ-ն կազմակերպեց հոգեբանական առաջին օգնության դասընթաց Գորիսի և Կապանի իր գործընկերների համար
13 նոյեմբերի 2022
Վերապատրաստման ծրագիրը ներառում էր մի շարք նիստեր, որոնք վարում էին ՄԱԿ ՓԳՀ-ի գործընկերները:
2022 թ. նոյեմբերի 11-13-ին Ջերմուկ քաղաքում ՄԱԿ-ի Փախստականների գործակալության (ՄԱԿ ՓԳՀ) Հայաստանի գրասենյակը կազմակերպեց հոգեբանական առաջին օգնության դասընթաց Գորիսի համայնքապետարանի թիմի, Կապանում գործող «Սյունիքի մարզի երեխայի և ընտանիքի աջակցության կենտրոնի» և «Երեխաների աջակցության կենտրոնի» ներկայացուցիչների համար, որոնք մեծամասամբ սոցիալական աշխատողներ և ծառայություններ մատուցողներ էին:
Իր բացման խոսքում Գորիսի համայնքապետի տեղակալ տ-ն Իրինա Յոլյանը շնորհակալություն հայտնեց ՄԱԿ ՓԳՀ-ին և նշեց.
«Հոգեբանական առաջին օգնությունը կարևոր դասընթաց է, որը կարող է չափազանց օգտակար լինել Գորիս և Կապան համայնքների «առաջնագծում» կանգնած գործընկերների համար, ովքեր առաջինն են օգնության ձեռք մեկնում տեղահանված մարդկանց»։
Գորիսի համայնքապետի տեղակալը նաև բարձր գնահատեց ՄԱԿ ՓԳՀ Երևանի և Գորիսի գրասենյակների հետ շարունակական և արդյունավետ համագործակցությունը՝ կարևորելով Լեռնային Ղարաբաղից տեղահանված ընտանիքներին տրամադրվող մարդասիրական օգնությունը: Մասնավորապես՝ տ-ն Յոլյանն ընդգծեց 2022 թ. սեպտեմբերի 13-14-ին հայ-ադրբեջանական սահմանին տեղի ունեցած ռազմական գործողությունների հետևանքով տուժած ընտանիքներին ՄԱԿ ՓԳՀ-ի կողմից ցուցաբերվող հրատապ աջակցությունը։
ՄԱԿ ՓԳՀ Հայաստանի ղեկավարի ժամանակավոր պաշտոնակատար պ-ն Ալմազ Բուրկուտովն իր ողջույնի խոսքում շնորհակալություն հայտնեց Գորիսի քաղաքապետարանին և համայնքային կազմակերպություններին՝ ՄԱԿ ՓԳՀ-ի հետ շարունակական և արդյունավետ համագործակցության համար:
Դասընթացի անհրաժեշտության մասին բարձրաձայնել էր Գորիսի համայնքապետի տեղակալը՝ համայնքում կարողությունների զարգացման և աջակցության միջոցառումների վերաբերյալ ՄԱԿ ՓԳՀ-ի հետ համատեղ անցկացված քննարկումներից մեկի ժամանակ։
«Ուրախ ենք, որ այսօր Ջերմուկում կազմակերպել ենք հոգեբանական առաջին օգնության դասընթացը համայնքների աշխատակիցների համար: Թույլ տվեք օգտվել այս հնարավորությունից և ՄԱԿ ՓԳՀ-ի անունից իմ երախտագիտությունը հայտնել Գորիսի համայնքապետարանին և Կապանի համայնքահեն կազմակերպություններին՝ ձեր հյուրընկալության և Գորիսի ու Կապանի համայնքներում բնակվող տեղահանված ընտանիքներին ցուցաբերված աջակցության համար»,- ասաց պարոն Բուրկուտովը՝ մասնակիցներին մաղթելով արդյունավետ դասընթաց։
Վերապատրաստման ծրագիրը ներառում էր մի շարք նիստեր, որոնք վարում էին ՄԱԿ ՓԳՀ-ի գործընկերները՝ Գորիսի գրասենյակի ղեկավար տ-ն Սահականուշ Եղիազարյանը, իրավաբանական բաժնի աշխատակից Կարեն Խաչատրյանը, ինչպես նաև «Ինթրա» հոգեբանական առողջության կենտրոնի աշխատակից, հոգեբան տ-ն Անի Ազիզյանը։
ՄԱԿ ՓԳՀ-ի պաշտպանության մանդատի, արտակարգ իրավիճակներում աշխատանքի և մարդասիրական արձագանքման վերաբերյալ պրեզենտացիան զուգորդվեց առանձին դեպքերի ուսումնասիրությամբ, քննարկումներով և հարցուպատասխանով։ Հոգեբանական առաջին օգնության դասընթացը ներառեց սթրեսի կառավարման, հոգեբանական առաջին օգնության, ներառյալ՝ կարեկցանքի և աջակցության կարևորության, հոգեկան գերհոգնածության կանխարգելման և ինքնակարգավորման վերաբերյալ դասընթացներ:
Մասնակիցները հնարավորություն ունեցան հասկանալու տրավմատիկ իրադարձությունների հետևանքով առաջացած սթրեսի և հոգեբանական դժվարությունների տեսությունն ու հետևանքները, ստացան գործնական խորհուրդներ սթրեսի և տագնապի զգացողության դեմ պայքարելու վերաբերյալ:
«Հոգեբանական առաջին օգնության ուսուցումն իսկապես շատ կարևոր միջոց է «առաջնագծում» աշխատողների համար, որպեսզի նրանք անհապաղ աջակցություն ցուցաբերեն շահառուներին և օգնեն հաղթահարել իրենց անհանգստությունը և տագնապները», - ասաց Անի Ազիզյանը։
«Այս դասընթացը կարևոր է, քանի որ այն նաև կներկայացնի ինքնակարգավորման որոշ գործիքներ սոցիալական աշխատողների և այլ ծառայություններ մատուցողների համար՝ կանխելու հոգեբանական տրավման և այրումը, որոնց կարող եք բախվել ձեր ամենօրյա դժվարին աշխատանքի ընթացքում», - բացատրեց հոգեբանը:
Եռօրյա դասընթացն անցկացվեց ինտերակտիվ եղանակով, գործնական վարժություններով և դերախաղերով։ Ինչպես մասնակիցները նշեցին, այն հնարավորություն տվեց ստանալ օգտակար տեղեկություններ և ձեռք բերել հմտություներ, որոնք օգտակար կլինեն և՛ շահառուների, և՛ իրենց համար: