«Թխվածքաբլիթներից» դեպի պատշաճ սննդի տրամադրում․ Ռուսաստանի Դաշնության կառավարության պաշտոնյաները Հայաստան են այցելել՝ տեսնելու ՄԱԿ-Ի Պարենի համաշխարհային ծրագրի (ՊՀԾ) «Դպրոցական սնունդ» ծրագիրը

ՌԴ ֆինանսների փոխնախարար պրն. Տիմուր Իգորևիչ Մաքսիմովն ու Միջազգային ֆինանսների վարչության պետ պրն. Պավել Վալերևիչ Սնիսորենկոն, ինչպես նաև միջազգային զարգացման աջակցության բաժնի ղեկավար Դարյա Կիրիլլովան և բաժնի ղեկավարի տեղակալ Ալինա Կրասիլնիկովա Հայաստան են այցելել՝ նպատակ ունենալով տեղում ծանոթանալ ՄԱԿ-ի Պարենի համաշխարհային ծրագրի կողմից բոլոր մարզերում ներդրված «Դպրոցական սնունդ» ծրագրին, որն աստիճանաբար փոխանցվում է Հայաստանի կառավարությանը: Այցին միացել է նաև ՌԴ «Ճյուղային սննդի ինստիտուտ»-ի նախագահ պրն․ Վլադիմիր Չերնիգովը։

Այցի գլխավոր նպատակն էր անձամբ տեսնել Ռուսաստանի Դաշնության կողմից Հայաստանի Հանրապետությանը տրամադրված պարենային ապահովության, մարդկային ռեսուրսների և համայնքների զարգացմանը միտված  երկարաժամկետ ֆինանսական աջակցության արդյունքները: Այցի ընթացքում նրանք նաև ծանոթացան, թե ինչպես է «Դպրոցական սնունդ» ծրագիրը դարձել ներառական մոդել, որի շնորհիվ Հայաստանի 10 մարզերի 1-4-րդ դասարանցիները ձեռք են բերել մաքրության/հիգիենայի,  բնապահպանության, առողջ սննդակարգի և առողջության հետ կապված հմտություններ ու գիտելիքներ:  

Այցի ընթացքում ՀՀ ԿԳՄՍ նախարարության հանրակրթության վարչության քաղաքականության մշակման և վերլուծության բաժնի պետ Անուշ Լալազարյանը ուղեկցեց ռուսաստանյան պատվիրակությանը՝ կիսվելու ծրագրի հաջող փորձով և ՀՀ կառավարության, Ռուսաստանի Դաշնության և Պարենի համաշխարհային ծրագրի միջև արժեքավոր համագործակցության ազդեցության արդյունքներով:

Ռուսաստանյան պատվիրակությունը ՄԱԿ-ի Պարենի համաշխարհային ծրագրի հետ միասին այցելեց Չարենցավանի և Թեղուտի դպրոցներ, ուր տարրական դասարանների ավելի քան 400 դպրոցականներ ամեն օր սնվում են տաք և առողջարար կերակուրներով:

Չարենցավանի դպրոցում ՊՀԾ-ն ցուցադրեց դպրոցական սննդի և խոհանոցային ենթակառուցվածքներում կատարված ներդրումները, որոնց շնորհիվ հնարավոր է դարձել միջավայր փոխել և «թխվածքաբլիթներից» անցում կատարել երեխաներին պատշաճ սննդի տրամադրմանը, ինչպես նաև ցուցադրել տարիների նշանակալից նվաճումները: ՊՀԾ-ն Ռուսաստանի Սննդի ճյուղային ինստիտուտի (SIFI) փորձագետների աջակցությամբ սկսել է մարզ առ մարզ և դպրոց առ դպրոց արդիականացնել դպրոցական ճաշարանների և խոհանոցների ենթակառուցվածքները՝ քանդված և ոչ պատշաճ տեսքով տարածքները վերածելով հարմարավետ, լուսավոր և ժամանակակից սարքավորումներով հագեցած ճաշարանների:

«Դպրոցական սնունդ» ծրագրի կայունությունն ապահովելու նպատակով՝ ՊՀԾ-ն  ՌԴ «Ճյուղային սննդի ինստիտուտի» փորձագետների հետ մշակել է տրանսֆորմատիվ մոտեցում, որը թույլ է տալիս դպրոցներին միրգ և բանջարեղեն աճեցնել՝ միաժամանակ ընդլայնելով դպրոցների կարողությունները և ծրագրում ներդնելով ժամանակակից, մաքուր և բնապահպանական տեխնոլոգիաներ, ինչպիսիք են՝ հիդրոպոնիկ և կաթիլային ոռոգման համակարգերը, հակակարկտային ցանցերն ու արևային կայանները:

Թեղուտի դպրոցում երկու կառավարությունների ներկայացուցիչները հնարավորություն կունենան տեսնելու ծրագրի վերափոխումը և հասկանալու թե ինչպես են դպրոցական գյուղատնտեսության մեջ ներդրումները նպաստում երեխաների՝ առողջ սնվելու սովորություններին, ներգրավվում համայնքները՝ ուսումնական հարթակ դառնալով երեխաների և համայնքների անդամների համար, ինչպես նաև ստեղծվում աշխատատեղեր, և վերջապես դպրոցների համար ծառայում որպես լրացուցիչ եկամտի աղբյուր:

ՊՀԾ-ն ինտեգրված մոտեցում է ցուցաբերում Հայաստանում «Դպրոցական սնունդ» ծրագրի նկատմամբ՝ նպաստելով առողջ սննդի հանրայնացմանն ու համայնքային զարգացմանը: Պատվիրակությունը կայցելի «Կենաց Հաց» Ամբողջահատիկի Ակադեմիա ուսուցման և ռեսուրսային կենտրոն և մեկ հացի փուռ, որոնց ՊՀԾ-ն աջակցություն է տրամադրել  «Ամբողջահատիկ ցորենի արժեշղթա» ծրագրի շրջանակում, որտեղ Տավուշի և Լոռու մարզերի երեխաները իրենց ընդմիջման ժամանակ ամբողջահատիկ ցորենից պատրաստված հաց են ուտում։