Հայաստանում ՄԱԿ-ի մշտական համակարգողի պաշտոնակատարի ուղերձը Ատելության խոսքի դեմ պայքարի միջազգային օրվա առթիվ
Տիկին Լիլա Փիթրս Յահիայի ուղերձը Ատելության խոսքի դեմ պայքարի միջազգային օրվա առթիվ։
Հաշվի առնելով, որ այս տարի առաջին անգամ ենք նշում Ատելության խոսքի դեմ պայքարի միջազգային օրը, բոլորս պետք է հավաքական և համաձայնեցված գործողությունների դիմենք հիմնարար իրավունքների այս կոպիտ խախտումների դեմ պայքարում և տարածենք ՄԱԿ-ի Գլխավոր քարտուղար Անտոնիո Գուտերեշի ուղերձը, որում ասվում է.
«Ատելության խոսքը հարձակում է հանդուրժողականության, ներառականության, բազմազանության և մարդու իրավունքների նորմերի ու սկզբունքների էության վրա: Ավելի լայն իմաստով՝ այն խարխլում է սոցիալական համախմբվածությունը, քայքայում է ընդհանուր արժեքները և կարող է բռնության հիմք դնել՝ խոչընդոտելով խաղաղության, կայունության, կայուն զարգացման և մարդու իրավունքների ապահովմանը»:
Ամբողջ աշխարհում տեսնում ենք այլատյացության, ռասիզմի և անհանդուրժողականության անհանգստացնող մասշտաբների հասարակական աջակցություն: Սոցիալական մեդիան և հաղորդակցության այլ ձևերը օգտագործվում են որպես ատելություն սերմանելու հարթակներ: Հանրային քննարկումը քաղաքական նպատակներով օգտագործվում է սադրիչ հռետորաբանությամբ, որը խարանում և ապամարդկայնացնում է փոքրամասնություններին, միգրատներին, փախստականներին, կանանց:
Սա առանձին երևույթ չէ, կամ պարզապես արտառոց մարդկանց բարձր ձայն: Ատելության խոսքը կարող է արագ վերաճել խտրականության, թշնամանքի և բռնության հրահրման և կարող է վտանգի ենթարկել համայնքներին:
Ատելության խոսքին հասցեագրումը չի նշանակում սահմանափակել կամ արգելել խոսքի ազատությունը։ Ընդհակառակը, նշանակում է խրախուսել բաց երկխոսությունը և քննադատական խոսքը՝ հարգելով մարդկային արժանապատվությունը: Նշանակում է՝ հիշեցնել ինքներս մեզ համերաշխության և կարեկցանքի կարևորության մասին:
Ատելության խոսքի դեմ պայքարը առանցքային դեր ունի ՄԱԿ-ի զարգացման և խաղաղության օրակարգի առաջընթացի համար:
ՄԱԿ-ը բոլոր մակարդակներում՝ միջազգային, տարածաշրջանային և երկրի մակարդակով, ընդլայնում է իր ջանքերը ատելության խոսքի, կեղծ տեղեկատվության և ապատեղեկատվության դեմ պայքարելու համար՝ ներգրավելով կառավարություններին, խորհրդարանականներին, լրատվամիջոցներին, քաղաքացիական հասարակությանը, կանանց, երիտասարդներին և այլ շահագրգիռ կողմերի:
Որպես օրինակ՝ կրթությունը, ուսումնառությունը և քննադատական մտածողության կարողությունները հիմնական գործիքներն են, որոնք բոլորս կարող ենք օգտագործել՝ կառուցելու և ամրապնդելու ժողովրդավարական արժեքները, ինչպիսիք են մարդու իրավունքների հարգումը, բազմազանությունը, սոցիալական ներառումը, արդարությունը և գենդերային հավասարությունը:
Չլռե՛նք ատելության խոսքին առերեսվելիս. մեր ընդհանուր պարտականությունն է բարձրաձայնել և խթանել հանդուրժողականությունն ու փոխըմբռնումը՝ ի շահ մեր համայնքների, հասարակությունների և երկրների:
Նպատակները, որոնց մենք աջակցում ենք այս նախաձեռնությամբ
