ԱՀԿ եվրոպական տարածաշրջանային գրասենյակի տնօրենը և ՀՀ առողջապահության նախարարը ստորագրել են երկամյա համաձայնագիր առողջապահությունը բոլորի համար հասանելի դարձնելու, պատվաստումները և առողջ ապրելակերպը խթանելու համար

ՀՀ առողջապահության նախարար Անահիտ Ավանեսյանը և ԱՀԿ եվրոպական տարածաշրջանային գրասենյակի տնօրեն դոկտոր Հանս Հենրի Պ. Կլյուգեն այսօր ստորագրել են Համագործակցության երկամյա համաձայնագիր (ՀԵՀ), որի առանցքում են բոլորին հասանելի որակյալ առողջապահությունը, առողջապահական արտակարգ իրավիճակներից արդյունավետ պաշտպանությունը, առողջ համայնքների զարգացումը։ Դոկտոր Կլյուգեն Հայաստանում է երկօրյա այցով:

ՀԵՀ-ում սահմանվում են ԱՀԿ-ի և ՀՀ կառավարության միջև 2022-2023 թվականների համագործակցության առաջնահերթությունները, որոնց նպատակն է աջակցել ՀՀ առողջապահության նախարարությանը առողջապահական ազգային նպատակներին հասնելու գործում՝ սերտորեն համագործակցելով քաղաքացիական հասարակության, զարգացման գործընկերների և այլ հիմնական շահագրգիռ կողմերի հետ:

ՀԵՀ-ն առաջնահերթություն է տալիս առողջապահական որակյալ ծառայությունների հասանելիությանը Հայաստանի յուրաքանչյուր քաղաքացու համար՝ անկախ նրա ֆինանսական կարգավիճակից, առողջապահական արտակարգ իրավիճակներից արդյունավետ պաշտպանությանը և առողջ համայնքների զարգացմանը, հանրային առողջապահական այնպիսի քաղաքականությունների և գործողությունների միջոցով, որոնք ծառայում են Հայաստանի քաղաքացիների համար ավելի լավ կյանք և բարեկեցություն ապահովելու գործին:

«Առողջապահության նախարարության և ԱՀԿ-ի միջև համագործակցությունն առանցքային է, որպեսզի կարողանանք հասնել առողջապահական այն հիմնաքարային ցուցանիշներին, որոնց ձգտում է ՀՀ կառավարությունը: Ուրախ եմ նշել, որ Կառավարության 2021-2026 թվականների ռազմավարությունը ներառում է առողջապահական այնպիսի ցուցանիշներ, որոնք համահունչ են համաշխարհային օրակարգին։

Քանի որ COVID-19 համավարակի վերջին ալիքը աստիճանաբար նահանջում է, մենք, բարեբախտաբար, կարող ենք կրկին ուղղել մեր ջանքերն ու ռեսուրսները դեպի գլոբալ առողջապահական սպառնալիքներ, որոնք դեռևս առկա են:

2022-2023 թվականների Համագործակցության երկամյա համաձայնագրի շրջանակում առավել ուշադրություն կդարձնենք մեզ համար կարևորագույն այնպիսի ոլորտներին, ինչպիսիք են համընդհանուր առողջապահական ծածկույթի ապահովումը, առողջապահական համակարգի հզորացումը, առողջապահական արտակարգ իրավիճակներից պաշտպանությունը, առողջ ապրելակերպի խթանումն ու բազմաթիվ այլ ոլորտներ», - նշել է ՀՀ առողջապահության նախարար Անահիտ Ավանեսյանը։

ՀԵՀ-ն հիմնված է ԱՀԿ-ի և ՀՀ կառավարության միջև երկարատև գործընկերության ընթացքում արձանագրված ձեռքբերումների վրա, որոնց թվում են նաև ծխախոտի դեմ պայքարը, արտակարգ իրավիճակներին արձագանքելու պատրաստվածությունը, արդյունավետ արձագանքը COVID-19 համավարակին, հոգեկան առողջությունը։

Այն համահունչ է հանրային առողջապահության միջազգային ռազմավարական այնպիսի նպատակներին, ինչպիսիք են ԱՀԿ Աշխատանքի եվրոպական ծրագիրը և առողջապահությանը վերաբերող Կայուն զարգացման նպատակները:

«Այսօր ստորագրված համաձայնագրով Հայաստանի օրակարգում առավել առաջնային է դառնում առողջությունը և կարևորվում է դրա նշանակությունը որպես մարդու հիմնարար իրավունք և զարգացման առանցքային առաջնահերթություն՝ ավելի լավ տնտեսության, խաղաղության և անվտանգության համար», - նշել է ԱՀԿ եվրոպական տարածաշրջանային գրասենյակի տնօրեն դոկտոր Կլյուգեն։

«ԱՀԿ-ի և ՀՀ կառավարության միջև համագործակցությունը երկար և արդյունավետ է եղել, և մենք կշարունակենք աշխատել սերտորեն՝ առաջ տանելու առողջապահական ազգային օրակարգը՝ առողջապահական համակարգի հզորացումը, համընդհանուր առողջապահական ծածկույթի ապահովումը, առողջապահական արտակարգ իրավիճակներից պաշտպանությունը, առողջ ապրելակերպի խթանումը», - ավելացրել է նա:

Հայաստան այցելելով Իմունականխարգելման եվրոպական շաբաթվա ընթացքում, ԱՀԿ եվրոպական տարածաշրջանային գրասենյակի տնօրեն դոկտոր Կլյուգեն ընդգծեց պատվաստանյութերի և պատվաստումների կարևորությունը, որոնք հիմք են հանրային առողջապահական գործող համակարգերի համար:

Դոկտոր Կլյուգեն ընդգծեց իմունիզացիայի կարևորությունը՝ որպես հանրային առողջապահության միջոց, ինչպես նաև այն, որ դրա միջոցով փրկվել են միլիոնավոր կյանքեր, և հորդորեց շարունակել համատեղ ջանքերը՝ ավելացնելու COVID-19 դեմ պատվաստումները՝ մարդկանց, առողջապահական համակարգերը և բուժաշխատողներին պաշտպանելու համար: