Առողջության համաշխարհային օրվա շրջանակում ՀՀ Առողջապահության նախարարությունը, Միավորված ազգերի կազմակերպությունն (ՄԱԿ) ու Առողջապահության համաշխարհային կազմակերպությունը (ԱՀԿ) կոչ են անում միավորել ջանքերը առողջ մոլորակ ունենալու համար՝ ավելի առողջ վաղվա

ԱՀԿ-ի գնահատմամբ, յուրաքանչյուր տարի ավելի քան 13 միլիոն մահ ողջ աշխարհում, այդ թվում՝ 1,4 միլիոնը՝ ԱՀԿ եվրոպական տարածաշրջանում, առաջանում է շրջակա միջավայրի այնպիսի գործոնների հետևանքով, որոնք հնարավոր է կանխարգելել: Այս տարվա թեման՝ «Մեր մոլորակը, մեր առողջությունը» ընդգծում է մեր մոլորակի և մարդկանց, կենդանիների ու բույսերի առողջության միջև փոխկապակցվածությունը:

Միայն օդի աղտոտվածության պատճառով ԱՀԿ եվրոպական տարածաշրջանում ամեն րոպե մեկ մարդ է մահանում։ Մարդկային ազդեցության հետևանքով կլիմայի փոփոխության աննախադեպ արագության և մարդու առողջության վրա կործանարար ազդեցության պայմաններում հաճախ ամենաշատը տուժում են ամենախոցելիները:

Վտանգավոր թափոնները, աղտոտված ջուրը, անբավարար սանիտարական պայմանները, ծխախոտը և արդյունաբերության վատ կառավարումը այն խնդիրներից մի քանիսն են միայն, որոնք սպառնալիք են ոչ միայն մարդկանց առողջության, այլև մեր օդի, ջրի և շրջակա էկոհամակարգերի համար: Մարդկանց, կենդանիներին և բույսերին տրվող հակաբիոտիկները և այլ հակամանրէային դեղերը մնում են շրջակա միջավայրում և մեր խմելու ջրում ՝ ստեղծելով հակամանրէային դեղերի նկատմամբ դիմակայուն սուպերբակտերիաներ և դեղամիջոցների նկատմամբ դիմակայուն այլ օրգանիզմներ:

 «Մեկ առողջություն» մոտեցումը՝ մարդկանց, կենդանիների և շրջակա միջավայրի առողջության փոխկապակցվածության գիտակցումը, ինչպես նաև  կառավարություններին հասանելի կայուն լուծումները կարող են օգնել էապես մեղմել կլիմայի փոփոխության վատթարագույն հետևանքները և մեր առողջությանը սպառնացող վտանգները: Վերաիմաստավորելով, թե ինչպես են քաղաքները և քաղաքային տարածքները գործելու ապագայում, կարելի է նպաստել օդի որակի բարելավմանը, ինչը կարևոր է հետհամաճարակային վերականգնման քաղաքականության շրջանակում:

«Մեկ առողջություն» մոտեցումն այսօր առավել քան երբևէ արդիական է` հաշվի առնելով օրեցօր մոլորակին սպառնացող համաճարակներն ու տարաբնույթ հիվանդությունները: Վերջին տարիներին կյանքը ցույց է տվել, որ առողջապահական համակարգերը պետք է լինեն առավել ուժեղ, առավել հզոր ու մարտունակ` դիմակայելու երկրագնդի գլոբալ փոփոխություններով պայմանավորված  մարտահրավերներին: Այս համընդհանուր ու համամարդկային խնդիրների լուծման գործում առողջապահության նախարարությունը համահունչ է գործընկերային քաղաքականությանը, որը միտված է  «Պաշտպանելով մոլորակը՝ պաշտպանենք մեր առողջությունը» շղթայի ապահովմանը: Սա առիթ է ևս մեկ անգամ անդրադառնալու և գնահատելու մեր բժիշկներին ու բուժքույրերին, որոնք ամեն օր պայքարում են մեր բնակչության առողջության պահպանման համար` հաճախ իրենց սեփական առողջության հաշվին»,- նշել է առողջապահության նախարար Անահիտ Ավանեսյանը:

«Ինչպես և անցած երեսուն տարիներին, ՄԱԿ-ի հայաստանյան գրասենյակը իր գործընկերների հետ միասին շարունակում է աջակցել Հայաստանին՝ ավելի կայուն և առողջ միջավայր ունենալու, առողջապահական խնդիրների վերաբերյալ հանրային իրազեկվածության բարձրացման և մարդկանց, հատկապես բնակչության առավել խոցելի և անտեսված խմբերի համար, որակյալ բժշկական ծառայություններ մատուցելու հարցում: Մարդկանց և մոլորակի առողջությունը պահպանելու համար մեր հավաքական պարտականությունն է հրատապ քայլեր ձեռնարկել՝ ձևավորելով հասարակություններ, որոնք առաջնահերթություն են տալիս բոլոր քաղաքացիների ներառական և հավասար բարեկեցությանը»,— նշել է Լիլա Փիթրս Յահիան՝ Հայաստանում ՄԱԿ-ի մշտական համակարգողի պաշտոնակատարը։

«Առողջ միջավայրը Հայաստանում և ցանկացած այլ երկրում կայունության և զարգացման հիմքն է։ Այս տարվա Առողջության համաշխարհային օրվա թեման հիշեցում է, որ շրջակա միջավայրի և առողջապահական խնդիրները պահանջում են արդյունավետ արձագանք՝ ողջ կառավարության և ողջ հասարակության կողմից», - նշում է Հայաստանում ԱՀԿ ներկայացուցիչ դոկտոր Ժիհան Թաուիլան:

Առողջապահության նախարարությունը, Առողջապահության համաշխարհային կազմակերպությունը և ՄԱԿ-ի Հայաստանյան գրասենյակը կնշեն Առողջության համաշխարհային օրը մեկամսյա արշավով, որը կներառի ինչպես առցանց, այնպես էլ անցանց միջոցառումներ՝ լուսանկարչական մրցույթ, ցուցահանդես և սոցիալական մեդիայի միջոցով իրականացվող միջոցառումներ։ Համատեղ արշավը կոչ է անում բոլոր քաղաքացիներին դառնալ լուծման մի մաս՝ միանալով հանուն մեր մոլորակի, հանուն մեր առողջության:  

Արշավի մասին տեղեկությունների համար, անցնել հետևյալ հղմամբ: