Զարգացման գործընկերների համակարգման հարթակը քննարկել է Հայաստանի Կառավարության նոր ծրագրին աջակցելու հնարավորությունները

Նախօրեին փոխվարչապետ Մհեր Գրիգորյանի և ՄԱԿ-ի մշտական համակարգող Շոմբի Շարփի համանախագահությամբ Կառավարությունում կայացել է Հայաստանի զարգացմանն աջակցող գործընկերների հետ համագործակցության համակարգման հարթակի (ԶԳՀՀ) հերթական հանդիպումը: Հանդիպմանը մասնակցել է նաև ՄԱԿ-ի Եվրոպայի և Կենտրոնական Ասիայի գրասենյակների տարածաշրջանային ղեկավար Գվի Յուպ Սոնը, ով երկօրյա աշխատանքային այցով ժամանել էր Հայաստան։

Տիկին Սոնն ընդգծեց ազգային կայուն զարգացման ռազմավարություն ունենալու կարևորությունը և վերահաստատեց ՄԱԿ-ի պատրաստակամությունը՝ օգնելու Հայաստանին կյանքի կոչել կառավարության նոր ծրագիրը, ինչպես նաև՝ հետագա ոլորտային ռազմավարությունները և գործողությունների ծրագրերը։

Թե՛ փոխվարչապետը, թե՛ ՄԱԿ-ի մշտական համակարգողն ընդգծեցին ԶԳՀՀ-ի կարևորությունը՝ որպես համագործակցության շուրջ գաղափարների ձևավորման հարթակ: Պարոն Գրիգորյանը նշեց, որ ԶԳՀՀ-ի նախորդ հանդիպումների ժամանակ քննարկված մի շարք գաղափարներ արդեն իսկ արտացոլվել են կառավարության նոր ծրագրում։ Իր հերթին, պարոն Շարփը շեշտադրեց հարթակի առավելությունները, որոնց շնորհիվ կառավարության անդամները և միջազգային զարգացման գործընկերները պարբերաբար հավաքվում են խմբային ձևաչափով՝ օգնելով նվազեցնել ծրագրերի համընկնումը և ապահովելով, որ կառավարության հիմնական գործընկերները նույն պատկերացումներն ունենան ազգային առաջնահերթությունների և միջազգային աջակցության վերաբերյալ:

Հանդիպման ընթացքում փոխվարչապետը ներկայացրել է Ազգային ժողովի կողմից սույն թվականի օգոստոսին ընդունված կառավարության նոր ծրագիրը, այդ թվում՝ ծրագրում ընդգրկված զարգացման վեց հիմնական ուղղությունները՝ անվտանգություն և արտաքին քաղաքականություն, տնտեսություն, ենթակառուցվածքների զարգացում, մարդկային կապիտալի զարգացում, օրենք և արդարադատություն և ինստիտուցիոնալ զարգացում։

Ապա Ֆինանսների նախարար Տիգրան Խաչատրյանը ԶԳՀՀ-ին ներկայացրել է կառավարության ֆիսկալ քաղաքականության հիմնական ուղղությունները և մակրոտնտեսական կայունության ապահովմանն ուղղված ընթացիկ միջոցառումները: Նախարարը կարևորել է մինչև 2025 թվականը պետական պարտքի նվազեցումը ՀՆԱ-ի տոկոսային մասով և ընդգծել է ֆիսկալ համախմբմանն ուղղված նախաձեռնությունները։

Դեսպաններն ու միջազգային կազմակերպությունների ներկայացուցիչներն անդրադարձել են փոխվարչապետի և ֆինանսների նախարարի կողմից ներկայացված կետերին և համառոտ ներկայացրել ազգային առաջնահերթություններին աջակցող իրենց առաջնահերթ ծրագրերն ու հիմնական նախաձեռնությունները: Բազմաթիվ հարցերի թվում, շեշտը դրվել է կորոնավիրուսի համավարակի և Լեռնային Ղարաբաղի հակամարտության երկակի ճգնաժամերից կանաչ և ներառական վերականգնման անհրաժեշտության վրա։ ՄԱԿ-ի մշտական համակարգողը նշել է, որ ամռանը ստորագրված 2021-2025 թվականների ՄԱԿ-ի Կայուն զարգացման գործընկերության շրջանակը համահունչ է ինչպես կառավարության նոր ծրագրում ներկայացված, այնպես էլ՝ զարգացման գործընկերների կողմից բարձրաձայնված առաջնահերթություններին:

Պարոն Շարփը նաև ընդգծել է առաջիկա մի քանի նախաձեռնությունների կարևորությունը, այդ թվում՝ Կայուն զարգացման նպատակների ազգային խորհրդի մեկնարկը, որը կօգնի վերահսկել և ապահովել Հայաստանի կողմից Օրակարգ 2030-ի շրջանակում ստանձնած պարտավորությունների կատարումը:

Մասնակիցները նաև համաձայնել են կառավարության ենթազգային համակարգող կառույցների, օրինակ՝ Սյունիքի կառույցների հետ համագործակցելու կարևորության և  ավելի փոքր աշխատանքային խմբերով  կառավարության ոլորտային ռազմավարություններին և գործողությունների ծրագրերին թիրախավորված արձագանքելու նախկին փորձը վերակենդանացնելու շուրջ։

Հանդիպման ավարտին պարոն Շարփն իր խորը ափսոսանքը հայտնեց՝ Հայաստանում իր առաքելության մոտալուտ ավարտի վերաբերյալ։ Նա նշեց, որ այս հանդիպումը ԶԳՀՀ-ն համանախագահելու իր վերջին հնարավորությունն էր։ Վերջինս, իր կարծիքով, Երևանում իր գտնվելու գրեթե չորս տարիների ընթացքում կարևոր դեր է խաղացել միջազգային հանրության համար։ Պարոն Շարփը շնորհակալություն է հայտնել փոխվարչապետին՝ իր առաջնորդության և անձնական հանձնառության համար, ինչի շնորհիվ համագործակցությունը հաջողել է: